Gylfi Þór Sigurðsson kom heim með 38 milljónir

Gylfi Þór Sigurðsson, leikmaður breska Úrvalsdeildarliðsins Tottenham, kom með 38 milljónir króna til landsins í gegnum fjárfestingarleið Seðlabankans í desember. Gerði hann það í gegnum útgerðarfélag sitt Blikaberg, sem hann á að fullu.

Nýta á fjármunina til fjármögnunar á innlendum rekstri. Sigurður Aðalsteinsson, varamaður í stjórn Blikabergs og faðir knattspyrnumannsins, vildi ekki tjá sig um málið við Morgunblaðið.

Blikaberg hagnaðist um 16 milljónir króna árið 2011 en um þrjár milljónir árið áður. Eigið fé nam tólf milljónum króna. Eignir námu 71 milljón króna, sem samanstanda að mestu af keyptum aflaheimildum og fiskiskipi.

Gylfi Þór er launahæsti íslenski knattspyrnumaðurinn um þessar mundir. Samkvæmt úttekt í áramótablaði Viðskiptablaðsins nema árslaun hans um 480 milljónum króna á ári, jafnvirði um 40 milljóna króna á mánuði.