Skapar tugi starfa í Sandgerði

Fyrirtækið Marmeti er þessa dagana að vinna að byggingu nýrrar hátæknifiskvinnslu í Sandgerði. Heildarfjárfesting verkefnisins er áætluð 609 milljónir og gert er ráð fyrir 41 starfsmanni við rekstur vinnslunnar. Í dag mun svo fyrirtækið undirrita samninga sem byggja á lögum um ívilnanir vegna nýfjárfestinga á Íslandi, en heimilt er í lögum að veita afmarkaðar ívilnanir ef sannað þykir að starfsemi fyrirtækja hafi í för með sér umtalsverðan ávinning fyrir þjóðarbúið.

Nýja fiskvinnsluhúsið verður um 2.000 fermetrar að stærð þar sem megináherslan verður lögð á vinnslu á ferskum fiski. Húsið býður þó einnig upp á frystingu, en afkastageta þess er um 4 til 5 þúsund tonn. 

Örn Erlingsson, útgerðarmaður frá Keflavík, er á bakvið framkvæmdirnar, en að sögn Sigrúnar Árnadóttur, bæjarstjóra í Sandgerðisbæ, er þetta mikil lyftistöng fyrir samfélagið, enda skapist þarna tugir langtímastarfa. Það verður að teljast nokkuð gott fyrir bæjarfélag sem telur um 1.600 manns og hefur glímt við hátt atvinnuleysi síðustu misseri.

Sigrún segir að mikið sé að gerast í bæjarfélaginu eins og er, en verið er að endurgera annað fiskvinnsluhús, þar sem ný fiskvinnsla mun flytja inn í. Þá er þriðja húsið, einnig tengt sjávarútvegi, í byggingu við Norðurgarð.

• Blogga um frétt