Niðurstaða þriggja rannsókna á næstunni

Á næstu misserum mun niðurstaða liggja fyrir í þremur málum sem Samkeppniseftirlitið hefur til skoðunar. Það eru mál sem tengjast viðskiptaskilmálum stóru bankanna, háttsemi Valitors varðandi færsluhirðingar og háttsemi Valitors og Borgunar á greiðslukortamarkaði. Þetta er meðal þess sem kemur fram í nýrri skýrslu Samkeppniseftirlitsins.

Skoðun eftirlitsins á viðskiptaskilmálunum lýtur að því hvort lög hafi verið brotin með því að veita afslátt af vöxtum íbúðalána ef lántakar uppfylltu tiltekin skilyrði um viðskipti. Slíkt hefði þau áhrif að viðskiptavinir ættu erfitt með að flytja viðskipti sín á milli banka.

Þá er meint undirverðlagning Valitors á færsluhirðingarmarkaðinum til skoðunar, auk þess sem meint samráð kortafyrirtækjanna við ákvörðun milligjalda og að standa í samkeppnishamlandi aðgerðum.

Samkeppniseftirlitið segir ennfremur að á næstunni verði tekin afstaða til fleiri rannsókna, svo sem kvartanir vegna óeðlilega hás uppgreiðslugjalds hjá stóru bönkunum þremur.

• Blogga um frétt