Valitor flytur höfuðstöðvarnar til Hafnarfjarðar

Greiðslulausnafyrirtækið Valitor mun flytja höfuðstöðvar sínar frá Reykjavík til Hafnarfjarðar í haust. Valitor og Reitir fasteignafélag hafa í þessu skyni undirritað langtíma leigusamning um rúmlega 3.500 fm húsnæði við Dalshraun 3 í Hafnarfirði. Um er að ræða þrjár efstu hæðirnar í þessari nýbyggingu sem mun hýsa nýjar höfuðstöðvar Valitor hér á landi í framtíðinni. Núverandi höfuðstöðvar eru á Laugavegi 77 en auk þess rekur fyrirtækið starfsstöð í Danmörku og opnar á næstunni skrifstofu í London. Þetta kemur fram í tilkynningu frá fyrirtækinu, en starfsmenn Valitor eru um 160 talsins.

Í tilkynningunni segir að umsvif Valitor hafa aukist verulega á síðustu árum og að nýtt aðsetur sé sniðið að nýjum áherslum í þjónustu og vöruþróun Valitors. Byggingin stendur við hlið Actavis hússins við fjölfarin gatnamót en báðar þessar eignir eru í eignasafni Reita. Á næstu mánuðum munu Reitir fullklára húsið og laga að þörfum Valitor. Sú byggingarframkvæmd er ein sú umfangsmesta sem vitað er um að ráðist verði í á þessu svæði næstu misserin.

Guðjón Auðunsson, forstjóri Reita og Viðar Þorkelsson, forstjóri Valitor, handsala samkomulagið.

• Blogga um frétt