Seðlabankinn andar léttar

Verðbólgutölurnar nú ættu að falla Seðlabankamönnum vel í geð. Við vaxtaákvörðunina í síðustu viku var óhagstæð verðbólgumæling í febrúar nánast einu mótrökin gegn því að halda vöxtum óbreyttum, og sagði í yfirlýsingu peningastefnunefndar að ef verðbólga hjaðnaði hægar en áður var spáð þyrfti að draga úr slaka peningastefnunnar, það er hækka nafnvexti, fyrr en ella. Verðbólgumælingin núna eykur hins vegar líkur á að verðbólga á 2. ársfjórðungi reynist nálægt þeim 3,5% sem Seðlabankinn spáði í febrúar síðastliðnum.

Þetta segir í morgunkorni greiningardeildar Íslandsbanka sem telur að Seðlabankamenn muni anda léttar yfir þessum fréttum. Segir greiningin jafnframt að verðbólgumælingin nú styrkir þá trú að stýrivextir Seðlabankans verði óbreyttir út árið.

• Blogga um frétt