Valka fær Nýsköpunarverðlaunin 2013

Hátæknifyrirtækið Valka hlaut Nýsköpunarverðlaunin 2013 á Nýsköpunarþingi í morgun, en fyrirtækið hefur meðal annars þróað og framleitt tæki til fiskvinnslu. Meðal nýrra tækja sem fyrirtækið hefur komið með á markað er röntgenstýrð beinskurðavél sem HB Grandi tók í notkun á síðasta ári.

Helgi Hjálmarsson, forstjóri og stofnandi Völku tók á móti verðlaununum úr hendi Steingríms J. Sigfússonar, atvinnu- og nýsköpunarráðherra. Sagði Steingrímur við tækifærið að rætt hefði verið um að nýja beinskurðavélin væri stærsta skref í bolfiskvinnslu síðan flæðilínur komu til sögunnar.

Frá árinu 1994 hafa Nýsköpunarverðlaun Íslands verið afhent því fyrirtæki sem þykir hafa skarað fram úr í þróun nýrrar vöru eða þjónustu, sem byggð er á rannsóknar- og vísindastarfi og náð góðum árangri á  markaði það árið. Í fyrra varð það fyrirtækið Primex á Siglufirði sem hlaut viðurkenninguna. Verðlaunagripurinn er stytta af frjósemisgoðinu Frey eftir Hallstein Sigurðsson myndhöggvara.

• Blogga um frétt