Fólk tárast í norðurljósaferðum

Á síðustu fimm árum hefur farþegum fyrirtækisins Sérferða fjölgað tuttugu og fimmfalt, úr tvö þúsund í um fimmtíu þúsund á þessu ári. Hjörtur Hinriksson, framkvæmdastjóri félagsins, segir í þættinum Viðskipti með Sigurði Má, að mikil vinna liggi á bakvið slíka fjölgun, en meðal annars þurfi samvinnu flugfélaga og hvalaskoðunarfyrirtækja.

Í heild eru um 180 þúsund manns sem fara í hvalaskoðun hér við land á ári hverju, en Hjörtur segir að um 100 þúsund fari frá Reykjavík. Þetta skapi um 100 störf í höfuðborginni á sumrin og um 40 allt árið, en hann segir enn vera hægt að sækja fram á þessum stað. Til dæmis hafi Sérferðir lagt áherslu á að leyfa fólki að sjá betur hvað er í sjónum með smásjám og þá séu til sýnis hvalbein og fleira í bátum félagsins. Þá geti skoðunarfyrirtækin gert út á fleiri tegundir ferða og nefnir hann meðal annars norðurljósaferðir sem fyrirtækið hefur verið með í nokkur ár.

Hjörtur  bendir á að ekki sé langt að fara til að upplifa einstakt umhverfi stutt frá höfuðborginni og að í norðurljósaferðunum sjáist það best hvað fólki finnist náttúran mögnuð hér á landi. Þannig tárist fólk oft í slíkum ferðum, enda búið að bíða jafnvel alla ævi til þess að sjá eitthvað sem Íslendingar taki sem gefnu.

• Blogga um frétt