Viðskipti | mbl | 28.7.2013 | 17:53 | Uppfært 23:18

Síðasta flugferðin endaði á J&L

Mynd 1 af 7 Það eru ekki margar skrifstofur á Íslandi sem eru með heilt hús inn á miðju gólfi. Rósa Braga

Mynd 2 af 7 Lúðrarnir, legokallin og gamla Apple tölvan eru í móttökunni. Rósa Braga

Mynd 3 af 7 Rósa Braga

Mynd 4 af 7 Hrafninn frægi fær gott útsýni yfir skrifstofuna. Rósa Braga

Mynd 5 af 7 Í fundarherberginu er að finna flotta hönnunarstóla. Rósa Braga

Mynd 6 af 7 Skrifstofan er með stóran glugga út að Laugaveginum, en þar fylgjast starfsmenn meðal annars með Götuleikhúsinu og öðru mannlífi. Rósa Braga

Mynd 7 af 7 Herbergin eru mörg merkt með gömlum bílnúmerum. Rósa Braga

Á auglýsingastofunni Jónsson & Le'macks við Laugaveg er margt gert til að lífga upp á skrifstofuhúsnæðið. Meðal annars er búið að byggja þar hús og garð, auk þess sem allskonar hönnun er víða. Þá er uppstoppaður hrafn á miðri skrifstofunni sem fylgist náið með öllu starfinu, en hann skilaði sér sjálfur til stofunnar og ætlaði sér greinilega að enda sem stofustáss. Mbl.is ákvað að kíkja í heimsókn og sjá hvernig aðstaða starfsmanna og umgjörð hjá fyrirtækinu er.

Þegar komið er inn tekur stór hilla með hinum ýmsu hlutum á móti manni. Þar má meðal annars finna antík Apple-tölvu, risastóran legokall og þá Lúðra sem fyrirtækið hefur unnið á síðustu árum, en það eru íslensku markaðsverðlaunin.

Stuttu innar tekur svo við manni hús sem hefur verið byggt inni á skrifstofunni og garður þar í kring. Kristín Ásta, skrifstofustjóri, útskýrir þessa hugmynd þannig að þegar stofan hafi flutt af Vesturgötunni hafi þau viljað hafa eitthvað sem minnti á þann stað og því hafi húsið verið reist í stíl við Naustið.

Eins og sannri auglýsingastofu sæmir er töluvert um nýstárlega hönnun og listaverk á stofunni, en starfsmenn hafa svo um nokkra staði að velja sem kaffihol og fundaraðstöðu.

Á miðri skrifstofunni gnæfir hrafn einn yfir starfsfólkinu, en hann var uppstoppaður fyrir nokkrum árum. Hann endaði lífdaga sína með því að klessa fast á glugga byggingarinnar og láta lífið á tröppum fyrirtækisins. Ákveðið var að heiðra fuglinn sem svo greinilega vildi enda lífdaga sína við Laugaveginn með því að láta hann hafa yfirsýn yfir bæði skrifstofuna og út um gluggann, niður á Laugaveginn.

Á efri hæðinni er svo ljósmynda- og klippiaðstaða. Meðal annars er boðið upp á örlítinn kvikmyndasal þar sem hægt er að horfa á nýjustu afurðirnar.

Á næstu dögum mun mbl.is skoða fleiri vinnustaði og kíkja á starfsumhverfi innanhúss hjá nokkrum fyrirtækjum.