Engar útsölur á sólarlandaferðum

Það eru engar útsölur á sólarlandaferðum því þær eru þegar að mestu uppseldar. Á meðan hafa verslanir og þjónustuaðilar sem treysta á sólarveður hér á landi þurft að nýta sér aukna söluhvata og aðrar aðgerðir til að koma vörum í umferð. Þetta segir Hörður Harðarson, sérfræðingur hjá Vert og kennari í vörumerkjastjórnun hjá Háskólanum í Reykjavík, í þættinum Viðskipti með Sigurði Má.

Hörður bendir á að áhrif veðurfars á kauphegðun fólks sé mikil. Það eigi ekki bara við um ís og regnhlífar, heldur séu kaup á garðhúsgögnum og fleira mikið háð því hvernig veðurfarið er.

Miðað við hvernig tíðin hefur verið hér á landi í sumar segir Hörður að margir söluaðilar þurfi nú á því að halda að september verði sólríkur til að koma hreinlega ekki illa út í haust. Þá þurfi menn jafnframt að standa sig betur þegar sólin sýni sig. Þetta geti reynst verslunum og þjónustuaðilum, sem eru með skammtímahugsun í markaðsstarfi, mjög erfitt, en aðrir sem sinni þeim hluta vel ættu að komast vel gegnum nokkra erfiða mánuði.

• Blogga um frétt