Viðskipti | mbl | 17.8.2013 | 11:15 | Uppfært 19.8.2013 11:31

Stjórnarformaðurinn í Stjörnugallanum

Mynd 1 af 14 Októ Einarsson, stjórnarformaður og Svanhildur Sigurðardóttir, samskipta- og samfélagsstjóri. Októ er Garðbæingur í húð og hár og mætti auðvitað í Stjörnubúningnum fyrir bikarúrslitaleikinn. Rósa Braga

Mynd 2 af 14 Bruggmeistararnir voru vígalegir í míkróbrugginu, en næsti bjór sem kemur þaðan er Teresa októberfestbjórinn. Rósa Braga

Mynd 3 af 14 Hver tankur er um 10 þúsund lítrar, en í ölsuðunni er allur bjór, malt og hvítöl blandað hjá Ölgerðinni. Rósa Braga

Mynd 4 af 14 Á verðlaunavegg fyrirtækisins var meðal annars að finna tvö verðlaun fyrir besta bjór og besta pilsner áranna 2010 og 2011. Rósa Braga

Mynd 5 af 14 Mörg fjölbreytt störf eru hjá Ölgerðinni, meðal annars vinnur fólk á rannsóknastofum við að þróa og bæta drykkjarvörur fyrirtækisins. Rósa Braga

Mynd 6 af 14 Blaðamaður kom í heimsókn stuttu eftir föstudagsfundinn. Nokkrir starfsmenn sátu þó áfram og spjölluðu um menn og málefni. Rósa Braga

Mynd 7 af 14 Litla fólkið er ekki skilið eftir og er aðstaða fyrir þau hjá fyrirtækinu. Svanhildur segir að mjög vinsælt sé hjá börnunum að fá að koma með foreldrunum í vinnuna, enda margt nýtt að sjá þar. Rósa Braga

Mynd 8 af 14 Vöruhúsið er með pláss fyrir 12500 bretti og er allt tölvustýrt þar. Rósa Braga

Mynd 9 af 14 Út um allt fyrirtækið má sjá auglýsingar og vörur frá fyrri tíð, en framleiðsla Malts hefur staðið yfir í 100 ár. Rósa Braga

Mynd 10 af 14 Þegar blaðamaður kíkti við voru nokkrir starfsmenn á skrifstofunni með föstudagskaffi, en þá var ekki langt í kökurnar. Rósa Braga

Mynd 11 af 14 Í sumar hafa starfsmenn getað keppst um að vinna afnot af rafmagnshjóli í eina viku. Svanhildur segir að mikil eftirsókn sé í hjólið, en almennt séu starfsmenn duglegir að hjóla til vinnu. Rósa Braga

Mynd 12 af 14 Lítið brot af þeim fjölmörgu flöskum sem Ölgerðin hefur framleitt í gegnum 100 ára sögu sína. Rósa Braga

Mynd 13 af 14 Þótt þessi gangur virki heillandi fyrir marga voru dósirnar allar tómar, en eftir var að fylla á þær. Rósa Braga

Mynd 14 af 14 Októ segir að Ölgerðin leggi mikið upp úr því að halda í sögu sína, en í móttökunni má meðal annars sjá flest allar auglýsingar fyrirtækisins langt aftur í tímann. Rósa Braga

Í miðju hruninu voru hin sameinuðu félög Danól og Ölgerðin nýlega búin að ákveða að færa allar átta starfstöðvar félagsins undir eitt þak og verið var að byggja nýtt húsnæði fyrirtækisins að Grjóthálsi. Ekki var hætt við framkvæmdir eins og hjá mörgum öðrum fyrirtækjum, enda búið að leggja mikið í breytingarnar og ljóst að mikið hagræði yrði að allir starfsmenn væru á sama stað.

Nýtt húsnæði tekið í notkun 2009

Nýtt og glæsilegt húsnæði var tekið í notkun um mitt ár 2009, en samkvæmt stjórnarformanni félagsins, Októ Einarssyni, þá var ljóst frá fyrsta degi að stækkunin hefði jafnvel mátt vera meiri, en lagerhúsnæði er til dæmis oftast fullnýtt. Mbl.is fékk að kíkja í heimsókn þar sem Októ og Svanhildur Sigurðardóttir, samskipta- og samfélagsstjóri leiddu blaðamann um húsið.

Strax frá upphafi var leitað til danskra arkitekta varðandi stækkunina, en þeir létu þarfagreina fyrirtækið og var húsnæðið allt sett upp í samræmi við útreikninga þeirra. Októ segir að hugmyndir þeirra og skipulag hafi virkað fullkomlega og til dæmis hafi ekki þurft að gera neinar innri breytingar síðan húsið var tekið í notkun.

Enginn með skrifstofur

Meðal þess sem lagt var með var að hafa engar skrifstofur, heldur er unnið í opnum rýmum. Þannig er forstjórinn til dæmis ekki lokaður af, heldur aðeins með skilrúm á milli sín og næsta starfsmanns. Þó er að finna nokkur lokuð vinnurými og fundarherbergi þurfi starfsmenn að sinna ákveðnum verkefnum eða funda.

Starfsmenn tóku rusl með sér heim

Eitt af því sem ölgerðin leggur áherslu á er flokkun rusls og Októ segir að þegar flutt var í nýja húsið hafi verið gerð regla um að engar ruslafötur væru við skrifborð. Þetta hafi fyrst leitt til þess að sumir starfsmenn gengu jafnvel svo langt að taka rusl með sér heim, en fljótlega hafi allir farið að flokka rusl betur.

Kökur á ferð og flugi

Þegar blaðamann bar að garði var föstudagsfundur fyrirtækisins að klárast, en á hverjum föstudagsmorgni hittast starfsmenn og stilla saman strengi sína. Þá er einnig algengt að deildir sjái um kaffi og með því eftir fundinn og mátti sjá marga starfsmenn með tertur á ferð og flugi um gangana.

Utan vinnutíma er einnig töluvert að gerast hjá starfsmönnum, en meðal annars er staðið fyrir heilsuvikum, innanhúskeppnum og hópastarfi. Þá segir Októ að reglulega sé haldið grill á sumrin, en það hafi þó verið frekar sjaldan í sumar vegna veðurs.

8 milljón lítrar af bjór og malti

Ölgerðin er líklega þekktust fyrir framleiðslu á drykkjarföngum ýmiskonar, en í ölsuðuhúsinu eru framleiddir um 8 milljón lítrar af bjór, hvítöli og malti á ári. Þá sé jafnvel verið að vinna í leiðum til að auka þá framleiðslu enn frekar, að sögn Októs.

Tankarnir í ölsuðuhúsinu eru um 10 þúsund lítrar, en til viðbótar við það er míkróbrugg staðsett í húsinu, en þar fá bruggarar fyrirtækisins frjálsar hendur við að útbúa nýjar og skemmtilegar tegundir sem hafa reglulega komið fyrir sjónir almennings í vínbúðunum. Októ segir að ákveðið hafi verið að hafa þá framleiðslu í minna mæli en sjálfa ölsuðuna, þar sem leiðinlegt væri að hella niður heilum 10 þúsund lítrum ef eitthvað mistækist. Þannig væru tankarnir í míkróbrugginu 800 lítrar, en fljótlega hafi þó orðið ljóst að það væri jafnvel of lítið.

Októberfest bjórinn Teresa

Blaðamaður fékk að líta nýjasta bjórinn augum, en það er októberfest bjórinn Teresa. Er hann nefndur eftir Teresa Saxe-Hildburghausen, en árið 1810 gekk Lúðvík, krónprins af Bæjaralandi, að eiga hana og var þá haldin 40 þúsund manna brúðkaupsveisla sem varð upphafið af októberfest.

Vínskólinn er svo að sjálfsögðu á sínum stað, en þangað hafa um sjö þúsund manns komið frá opnun, eða um 2% þjóðarinnar. Októ segir að viðtökur skólans hafi verið framar björtustu vonum, en upphaflega hafi þau áætlað að ná hugsanlega að hafa námskeið tvö kvöld í viku yfir vetrartímann, en í dag séu þrír starfsmenn sem skipti á milli sín þeim fjölmörgu hópum sem komi.

4000 gámar á ári

Ölgerðin er ekki bara framleiðslufyrirtæki, heldur er það stærsta innflutningsfyrirtæki landsins að sögn Októs. Í vöruhúsi félagsins er pláss fyrir 12500 bretti, en allt að 25 gámar koma á dag inn í húsið og yfir árið meira en 4000 gámar.