Aðalmeðferð í máli gegn fjórum mönnum sem eru ákærðir fyrir brot gegn lögum og reglum um gjaldeyrismál með því að hafa í sameiningu haft milligöngu um gjaldeyrisviðskipti fyrir 14,3 milljarða króna án heimildar hófst í Héraðsdómi Reykjaness í morgun.
Samkvæmt ákærunni áttu viðskiptin sér stað á tímabilinu mars til nóvember 2009 og högnuðust þeir um 656 til 693 milljónir, að því er segir í ákærunni. Þar kemur fram að viðskiptin hafi verið án lögmætrar heimildar eða leyfis frá Seðlabanka Íslands.
Meint brot þeirra ganga út á milligöngu um gjaldeyrisviðskipti með íslenskar krónur gegn erlendum gjaldeyri og fjármagnsflutninga á íslenskum krónum til Íslands tengda þeim gjaldeyrisviðskiptum. Starfsemin var rekin í nafni sænska félagsins Aserta AB sem ákærðu réðu yfir.
Meðaltal gengismunar á sölugengi á íslenskum krónum hér á landi og kaupgengis á svokölluðum aflandskrónum var um 4,3% samkvæmt ákærunni og því er áætlaður ágóði hinna ákærðu í hið minnsta 656 milljónir.
Ákærðir fyrir 14,3 milljarða millifærslur