Skúli í Subway byggir straujárnshús

Miklar breytingar eru áætlaðar við Hafnarstræti og Tryggvagötu í Reykjavík á næstunni, en hugmyndir um uppbyggingu á Hafnarstræti 17 og 19 eru langt á veg komnar samkvæmt heimildum mbl.is. Meðal annars er stefnt að því að gera fyrsta straujárnshús landsins á Hafnarstræti 19, en þar er í dag Rammagerðin. Þá verður húsnæðið, þar sem leigubílastöðin City Taxi er til húsa, látið víkja. Það er Skúli Gunnar Sigfússon, oft kenndur við Subway-veitingastaðina, sem er eigandi eignanna í gegnum félögin Sjöstjörnuna, Stjörnuna og Leiti eignarhaldsfélag.

Á útboðsþingi Samtaka iðnaðarins í síðustu viku greindi Dagur B. Eggertsson, formaður borgarstjórnar, frá því að verið væri að vinna að deiliskipulagi fyrir lóðirnar tvær, en hugmyndir í dag kveða á um að við hornhúsið, þar sem Rammagerðin er nú, bætist 817 fermetrar. Dagur sagði á fundinum að þetta yrði fyrsta straujárnshús landsins, en á meðfylgjandi mynd má sjá að núverandi framsetning sækir í smiðju svipaðra húsa t.d. í New York, en þar er hin þekkta Flatiron-bygging.

Við Hafnarstræti 17, þar sem leigubílastöðin er meðal annars til húsa, verður bætt 1.326 fermetrum. Halda á ásýnd Hafnarstrætishluta hússins, en þar hafa áður verið vinsælir skemmtistaðir eins og Kaffi Thomsen og Spotlight. Húsið hýsti áður Thomsen Magasín, en þar voru nýlenduverslanir um þarsíðustu aldamót.

Á næsta reit við, þar sem Bæjarins beztu pylsur eru með söluturn, er svo áætlað að gera huggulegt torg, en gert er ráð fyrir að pylsusalan verði eftir sem áður á sama stað.

Á föstudaginn var tilkynnt að á lóðinni við Tryggvagötu 13 myndi ný sex hæða bygging rísa, en þar verður meðal annars Borgarbókasafnið með aðstöðu.

Rúmlega 1.300 fermetrum verður bætt við byggingarmagn Hafnarstrætis 17. Stærstur hluti þess verður á þeim hluta lóðarinnar sem vísar að Tryggvagötu. Við hlið lóðarinnar er áætlað að gera huggulegt torg kringum Bæjarins beztu pylsur.

• Blogga um frétt