Viðskipti | mbl | 4.3.2014 | 9:03 | Uppfært 5.3.2014 10:14

Hafa trú á Suðurlandsbraut og Skeifunni

Eignir Eikar við Suðurlandsbraut, í Skeifunni og í Múlunum. Garðar Friðjónsson, forstjóri félagsins, segist hafa mikla trú á svæðinu. Mynd/mbl.is

Á síðustu árum hefur Suðurlandsbrautin ásamt nærliggjandi svæðum gengið í gegnum endurnýjun lífdaga og miklar endurbætur átt sér stað þar. Húsnæði hefur ýmist verið endurgert eða jafnvel endurbyggt og hefur bætt ásýnd svæðisins gert svæðið eftirsóknaverðara í útleigu en áður. Eik fasteignafélag hf. er meðal þeirra sem hafa sýnt þessu svæði áhuga og á fjölmargar eignir þar. Í samtali við mbl.is segir Garðar Hannes Friðjónsson, forstjóri félagsins, að hann hafi mikla trú á svæðinu og að líklegt sé að menn muni í auknum mæli horfa til endurbóta í Múlahverfinu á komandi árum.

Trú á svæðinu

Garðar segir að eins og stendur sé félagið ekki að horfa til frekari kaupa á svæðinu heldur einbeitir það sér að uppbyggingu og endurbótum á Suðurlandsbraut 6, 8 og 10, en Eik á þær eignir að hluta til eða fullu. Hann tekur þó ekki fyrir að fjölgað verði í eignasafninu ef réttar eignir bjóðist á góðu verði.

„Við höfum trú á svæðinu,“ segir Garðar og bætir við að það sé mjög miðsvæðis, stutt sé í Borgartúnið og miðbæinn. Hann bendir á að þrátt fyrir að Eik hafi fjárfest töluvert í húsnæði í Skeifunni, Múlanum og á Suðurlandsbraut eigi það aðeins brotabrot af öllum eignum á svæðinu. Á næstunni gæti þó fjölgað formlega í eignasafninu, en með samruna Eikar og Landfesta, sem Samkeppniseftirlitið á enn eftir að samþykkja, bætast meðal annars við nokkrar stórar eignir í Ármúla.

„Fyrir þá sem vilja vera miðsvæðis en ekki borga hæstu leiguna er þetta frábært svæði til að vera á,“ segir Garðar, en aðspurður hvort þetta verði næsti heiti reiturinn í Reykjavík segir Garðar að hann sé það að nokkru leyti. Þó verði að horfa til þess að ólíkir viðskiptavinahópar sæki í mismunandi staðsetningu, en ljóst sé að miðsvæðið, sem nái frá miðbænum að Skeifunni, sé mjög vinsælt í heild. Garðar kallar það miðsvæði viðskipta (e. central business district), en 70-80% af eignum Eikar eru þar.

Skrifstofugeirinn enn að þéttast

Á Suðurlandsbraut á Eik að hluta eða í heild húsnæði númer 6, 8, 10, 20, 32 og 48. Garðar segir að framkvæmdir á 6 séu á lokastigi en mikil vinna sé enn eftir með Suðurlandsbraut 8 og 10. Aðrar eignir þeirra og reyndar flestar eignir við götuna séu í góðu ásigkomulagi og segir Garðar að það styttist í að menn fari að færa sig upp í Múlana með endurnýjun. Töluverður munur sé á verðmæti og leigu þar, en að til framtíðar sé líklegt að það komi til uppbyggingar og endurnýjunar austan við Hallarmúlann. Þar sé töluvert um bakhús sem eru mun ódýrari í dag en annað á svæðinu og líklegt að horft verði til þegar verð á atvinnuhúsnæði hækki í framtíðinni.

Hann segist þó ekki eiga von á að núverandi hús verði strax rifin, heldur muni menn horfa til þess að byggja ofan á núverandi húsnæði, enda bjóði burðarvirki margra húsa þarna upp á það. Það sé enn eitthvað í að glænýtt skrifstofuhúsnæði rísi í stað eldra á sama stað. „Það er eitthvað lengra í að markaðurinn komist á þann punkt, þótt það styttist jafnt og þétt í það. Íbúðageirinn er klárlega kominn af stað og sama á við um hótelgeirann. Skrifstofugeirinn er ennþá að þéttast og þá hækkar leiguverð, sem í framhaldi mun leiða af sér tækifæri til nýbygginga og þá eru Suðurlandsbraut og Ármúli fínir staðir,“ segir Garðar.