Viðskipti | mbl | 16.12.2014 | 20:24

Áfangasigur fyrir MS

Einar Sigurðsson, forstjóri MS. mbl.is/Ómar

Mjólkursamsalan (MS) segir að áfrýjunarnefnd samkeppnismála hafi fellt úr gildi ákvörðun Samkeppniseftirlitsins í máli MS þar sem fyrirtækinu var ákvörðuð 370 milljón kr. sekt vegna meintrar misnotkunar á markaðsráðandi stöðu.

Þetta kemur fram í tilkynningu frá MS. Þar segir ennfremur, að því sé beint til Samkeppniseftirlitsins að rannsaka tiltekna þætti málsins ítarlegar og taka nýja ákvörðun í málinu.

„Þetta er vissulega áfangasigur. Málið telst ekki rannsakað til þeirrar niðurstöðu sem kynnt var og 370 milljóna króna sektin verður nú endurgreidd félaginu,“ segir Einar Sigurðsson, forstjóri Mjólkursamsölunnar, í tilkynningunni.

Fram kemur, að málið sé þó ekki að fullu frá. Áfrýjunarnefndin vísi því til Samkeppniseftirlitsins að rannsaka tiltekinn þátt þess betur er lýtur að samstarfi Mjólkursamsölunnar og Kaupfélags Skagfirðinga.

„Áfrýjunarnefndin bendir á að samstarfssamningur Mjólkursamsölunnar og Kaupfélags Skagfirðinga hafi ekki komið fram sem gagn í málinu fyrr en á í áfrýjunarferli og að ekki hafi farið fram nægjanleg rannsókn á því hvernig fyrirtækin unnu á grundvelli hans. Mjólkursamsalan áréttar að fyrirtækið veitti á öllum stigum málsins upplýsingar um efni samstarfsins og eðli þess sem byggði á þessum samningi. Áfrýjunarnefnd samkeppnismála telur samt að þurft hefði að kanna málið betur og vísar því til Samkeppniseftirlitsins. Mjólkursamsalan mun kappkosta að veita sem ítarlegastar upplýsingar í þeirri skoðnum og telur að þeirri rannsókn lokinni verði sýnt verði fyrirtækið hafi ekki brotið samkeppnislög,“ segir Einar ennfremur í tilkynningunni.

Þá segir hann, að Mjólkursamsalan sé einstakt fyrirtæki og um starfsemi þess þurfi að ríkja sátt.

„Við munum því kappkosta að upplýsa um alla þá þætti sem áfrýjunarnefndin telur rétt að verði skoðaðir. Við teljum að niðurstaðan, sem nú hefur verið vikið til hliðar, hafi verið byggð á mistúlkun á samspili samkeppnislaga og búvörulaga og misskilningi á þeim viðskiptum sem verið var að bera saman,“ segir hann jafnframt.

„Til þess að hægt sé að tala um að fyrirtækjum sé mismunað í viðskiptum eins og borið var á Mjólkursamsöluna verður að vera um að ræða sambærileg viðskipti en með mismunandi kjörum. Um það var ekki að ræða. Viðskiptin voru annars vegar hrein og skilmálalaus sala á mjólk til þriðja aðila og hins vegar miðlun á tilteknu magni hráefnis milli samstarfsaðila með skýrum skilmálum um til hvers hráefnið skyldi nýtt og hvert væri hámarksmagn, allt á grundvelli ákvæða búvörulaga. Þetta telur Mjólkursamsalan ekki unnt að leggja að jöfnu og því hafi ekki verið um mismunun að ræða. Af þeirri ástæðu telur fyrirtækið ljóst að það braut ekki samkeppnislög,“ segir Einar Sigurðsson að lokum.

Rannsaki nánar hugsanlega misnotkun MS