Hjónin Rúnar Fjeldsted og Björk Sigurðardóttir, eigendur Keiluhallarinnar, hafa ákveðið að leggja af keilurekstur í Öskjuhlíð. Þau hyggjast finna lóðinni og fasteigninni annað hlutverk. Keiluhöllin í Öskjuhlíð mun hætta rekstri þann 1. mars en veislusalurinn Rúbín verður þó starfræktur áfram.
Samkvæmt tilkynningu frá Keiluhöllinni ehf. mun Egilshöll taka alfarið við keflinu sem miðstöð keilunnar á Íslandi. Eins kemur fram að öllu starfsfólki Keiluhallarinnar í Öskjuhlíð hafi verið sagt upp störfum.
„Ástæða þess að við réðumst í uppbyggingu á Keiluhöllinni í Egilshöll var sú að hún myndi með tíð og tíma taka við keflinu af Öskjuhlíð sem miðstöð keilunnar á Íslandi. Þar er öll aðstaða til fyrirmyndar og góður tímapunktur núna til að hrinda nýjum áformum í gang í Öskjuhlíðinni”, segir Rúnar Fjeldsted, eigandi Keiluhallarinnar í tilkynningunni.
Lóðin í Öskjuhlíð er 1,3 hektarar og á henni er 3000fm bygging sem hýsir í dag Keiluhöllina og Rúbín. Segir í tilkynningunni að þegar hafi ýmsir aðilar sýnt lóðinni áhuga. Sömuleiðis kemur fram
„Samhliða þessum breytingum höfum við hjónin átt í viðræðum við áhugasama aðila um að taka við rekstrinum í Egilshöllinni. Þeim viðræðum er ekki lokið, þær ganga vel en ekki er tímabært að greina frekar frá því að svo stöddu”. segir Rúnar.