Forstjóri Promens hættir og höfuðstöðvar flytjast frá Íslandi

Verið er að ganga frá sölu Promens til Bretlands í samræmi við tilboð sem gert var í fyrirtækið í nóvember síðastliðnum.

Heimildir Morgunblaðsins herma að samkeppnisyfirvöld í Frakklandi hafi samþykkt söluna fyrir sitt leyti og því öllum hindrunum vegna sölunnar rutt úr vegi. Höfuðstöðvar fyrirtækisins flytjast frá Íslandi og Jakob Sigurðsson forstjóri þess lætur af störfum á sama tíma.

Framtakssjóður Íslands og Landsbankinn tóku ákvörðun um að selja Promens úr landi eftir að Seðlabankinn hafnaði beiðni þess um heimild til að flytja 30-50 milljónir evra úr landi, eða sem svarar 4,5-7,5 milljörðum króna, sem ætlaðar voru til frekari vaxtar fyrirtækisins. Fjármagnsins átti að afla með hlutafjárútboði hérlendis samhliða skráningu félagsins á hlutabréfamarkað, að því er fram kemur í Morgunblaðinu í dag.