Bensínverð fer ekki á flug

Verð á bensínlítranum hækkaði aftur upp fyrir 200 krónur á síðasta föstudag og stendur algengt verð nú í 202,5 til 204,9 krónum. Þrátt fyrir verðhækkun á liðnum dögum gera langrímaspár ekki ráð fyrir mikilli uppsveiflu í verði að sögn Magnúsar Ásgeirssonar, innkaupastjóra hjá N1.

Tunnan af hráolíu kostaði í morgun 55,84 dollara og í gærmorgun 52,82 en ávallt er reynt að halda bensínverðinu hér á landi í takt við heimsmarkaðsverðið. Magnús segir spár gera ráð fyrir að tunnan verði á um 55 til 65 dollara á næstu misserum og því engar gífurlegar verðhækkanir í sjónmáli. Þá vísar hann til þess að Saudi- Arabar hyggjast ekki draga úr olíuframleiðslu til þess að hækka verðið. „Þrátt fyrir að við séum að sveiflast á milli daga gera langtímaspár ráð fyrir stillu á markaði. Ekki er líklegt að verðið fari á flug,“ segir Magnús.

Bensínlítrinn var ódýrastur hjá Orkunni í dag á 202,5 krónur. Hann var á 202,6 krónur hjá Atlantsolíu og ÓB en 202,8 hjá N1 og Olís. Dýrastur var hann hjá Skeljungi á 204,9 krónur. Algengt verð á lítranum af dísilolíu var á 204,5 krónur til 204,9 krónur.

Hér er hægt að fylgjast með verðbreytingum.

• Blogga um frétt