Gjaldþrotaskiptum á Leikskólanum 101 ehf. var lokið hinn 4. mars sl. en ekkert fékkst greitt upp í kröfurnar er námu rúmum átta milljónum króna. Þetta kemur fram í Lögbirtingarblaðinu í dag.

Leikskólinn var úrskurðaður gjaldþrota hinn 22. janúar 2014 eftir að hafa verið í kastljósi fjölmiðla vegna ásakana um harðræði gegn börnum.

Málið komst upp þegar tveir sum­ar­starfs­menn leik­skól­ans sýndu Barna­vernd­ar­nefnd Reykja­vík­ur mynd­skeið þann 27. ág­úst 2013 og til­kynntu málið form­lega. Í bréfi Barna­vernd­ar til for­eldra barna á leik­skól­an­um kom fram að sýnt þætti að ann­mark­ar hefðu verið á starf­semi ung­barna­leik­skól­ans og að ómálga börn hefðu verið beitt harðræði. 

Fellt niður hjá lögreglu

Lögreglan hóf rannsókn á málinu en það var fellt niður í september á síðasta ári þar sem það þótti ekki lík­legt til sak­fell­ing­ar. Umboðsmaður barna sendi í kjölfarið lög­reglu­stjór­an­um á höfuðborg­ar­svæðinu og rík­is­sak­sókn­ara álit sitt vegna meðferðar málsins og sagðist harma niðurfellingu þess. „Umboðsmaður gagn­rýn­ir harðlega þá niður­stöðu að sú hátt­semi að slá barn á rass telj­ist ekki refsi­verð sam­kvæmt 217. gr. al­mennra hegn­ing­ar­laga nr. 19/​1940 og 99. gr. barna­vernd­ar­laga nr. 80/​2002,“ sagði m.a. í álitinu. 

Alls dvaldi 31 barn á leik­skól­an­um en börn­in voru 9-18 mánaða göm­ul. Starfs­menn leik­skól­ans voru níu tals­ins. Hulda Linda Stef­áns­dótt­ir, eig­andi Leik­skól­ans 101, ákvað í kjölfar málsins að hætta rekstri ung­barna­leik­skól­ans.

Ekki hjá Skattrannsóknarstjóra

Skóla- og frí­stunda­svið Reykja­vík­ur­borg­ar áframsendi mál er varðaði fjármál leikskólans skattrannsóknarstjóra eftir ábendingar frá foreldrum um að þeir hafi í einhverjum tilvikum greitt leikskólagjöldin inn á einkareikninga eiganda leikskólans og eiginmanns hennar. Samkvæmt upplýsingum frá Skattrannsóknarstjóra hefur málið þó ekki verið til rannsóknar og engar upplýsingar var um það að finna í málaskrá.

Tengdar fréttir

Leikskólinn 101

Ríkissaksóknari svarar fyrir sig

• Rangt að fella málið niður
• Eigandi 101 íhugar skaðabótamál
• Leikskólinn 101 gjaldþrota
• Rannsaka enn meint harðræði

» Fleiri tengdar fréttir

• Blogga um frétt