Skaðabótamál Björgólfs tekið fyrir

Mál Björgólfs Thors Björgólfs­sonar gegn Ró­berti Wessman og Árna Harðar­syni verður tekið fyrir í Héraðsdómi Reykjavíkur í dag. Í ágúst stefndi Björgólfur þeim fyrir að hafa á  ólög­mæt­an hátt dregið sér fjór­ar millj­ón­ir evra í eig­in þágu.

Telur Björgólfur að sér hafi verið skapað fjár­tjón sem sam­svar­ar helm­ing af þeirri fjár­hæð.

Í stefnu málsins, sem Viðskiptablaðið greindi upphaflega frá, var málavöxtum lýst þannig að forstöðumenn Salt Investments, þ.e. Róbert og Árni, hafi fært fjórar milljónir evra sem voru í eigu félagsins Mainsee 516 af reikningi Actavis, sem hafði fjármunina í vörslu, inn á reikning Salt Investments, án samráðs eða samþykkis stjórnar eða eigenda Mainsee 516.

Þeir Róbert og Árni hafi síðan nýtt fjármunina í eigin þágu og á sama tíma komið fjármununum frá því að vera fullnustaðir af Glitni banka, sem hafi lánað Mainsee 516 peningana til kaupa á lager af lyfjum. Björgólfur hafi þannig orðið fyrir fjártjóni vegna þess að hann hafði undirgengist sjálfskuldaraábyrgð ásamt Róberti og þurft að standa skil á hærri fjárhæð en ella, ef peningarnir hefðu ekki verið teknir „traustataki“ af Róberti eins og segir í stefnunni.

Sagði Björgólfi að kæla sig 

Eftir að fjölmiðlar greindu frá málinu sendi Róbert Wessman frá sér yfirlýsingu þar sem hann sagði spunameistara Björgólfs vera farna af stað eina ferðina enn.

„Ég vill nota tæki­færið og skora á Björgólf Thor  að fara í ís­fötubað, enda virðist hann þurfa smá kæl­ingu. Þannig má líka kom­ast hjá því að eyða tíma og fjár­mun­um dóm­stóla í að fjalla um til­hæfu­laus mál,“ sagði Róbert.

„Þann 25. apríl 2012 gerði ég og Salt in­vest­ment dómsátt við Björgólf Thor (fé­lög hans) sem fól í sér að máleferl­um aðila myndu ljúka. All­ir ættu að þekkja niður­stöðu þeirra mála, þar sem Novator var gert að greiða 40 millj­ón­ir evra en inn­heimta þeirra fjár­muna reynd­ist ár­ang­urs­laus. Þrátt fyr­ir að dóms­átt­in hafi verið Björgólfi Thor mjög hag­stæð virðist sem hann sé gjör­sam­lega friðlaus í þessu máli­ og er greini­lega mikið um að halda áfram deil­um við mig,“ sagði í yfirlýsingunni.

Róbert Wessman. mbl.is/Ómar Óskarsson

• Blogga um frétt