WOW þarf að ráða 200 manns

Flugfélagið WOW air hefur auglýst eftir fimmtíu nýjum flugmönnum en um er að ræða framtíðarstörf á nýjum flugvélum félagsins. Einnig er stefnt að því að ráða inn 100 flugliða á næstunni og fleiri á skrifstofuna. Aldrei hafa svona margir verið ráðnir til flugfélagsins í einu vetfangi. 

Líkt og áður hefur komið fram festi WOW air hef­ur kaup á tveim­ur nýj­um Air­bus A321-211 farþegaþotum í upphafi ársins Lista­verð á slík­um flug­vél­um er um 15 millj­arðar ís­lenskra króna.

Þá hóf flugfélagið að fljúga til Norður-Ameríku í mars og er nú boðið upp á ferðir allt árið um kring til Bost­on og Washingt­on. Líkt og fram kom í gær er félagið þá einnig að skoða flug til Long Island í New York. Einnig ætlar félagið að hefja flug til Monréal í Kanada snemma á næsta ári.

Í samtali við mbl á dögunum sagði Skúli Mogensen, forstjóri WOW, að unnið væri að því að bæta fleiri stöðum í Norður-Am­er­íku við leiðar­kerfið.

Fleiri starfsmenn með fleiri vélum

Svanhvít Friðriksdóttir, upplýsingafulltrúi WOW air, segir fyrirhugaðar ráðningar vera lið í auknum umsvifum félagsins. Hún bendir á að félagið sé að fara úr því að vera með sex flugvélar í að vera með níu vélar. „Þess vegna þurfum við að bæta við skrifstofuna, flugliðana og flugmennina. Samtals eru þetta um tvö hundruð manns,“ segir hún.

Skúli Mogensen sagði á dögunum í samtali við mbl að nauðsynlegt hefði verið að fjölg­a vélunum vegna aukins flugs vestur um haf. Þá sagði hann að Norður-Am­er­íku fluginu væri einnig ætlað til að auka nýt­ingu flug­vél­anna, þannig að hægt væri að fljúga frá Banda­ríkj­un­um til Íslands og þaðan áfram til Evr­ópu.

Ellefu fyrir tæpum fjórum árum

Óhætt er að segja að félagið hafi vaxið hratt á liðnum árum en það var stofnað í nóvember 2011. Þá störfuðu þar ellefu manns. Í dag starfa alls 270 manns hjá félaginu, bæði á skrifstofu og í háloftunum. Þar af eru 30 flugmenn og 150 flugliðar en 48 nýir flugliðar voru ráðnir inn núna í vor.

Eftir fyrirhugaðar ráðningar verða hins vegar alls um 470 manns í starfsliðinu.

WOW air flaug með yfir 400.000 gesti árið 2013. Talið er að farþegar verði um 750 þúsund árið 2015 og um 1,2 milljónir á næsta ári.

Flugliðar síðar á árinu

Umsóknarfrestur fyrir flugmannsstörfin er til 10. júlí n.k. en ekki hefur verið auglýst eftir flugliðum. Svanhvít telur líklegt að flugliðanámskeiðin verði haldin seint á þessu ári eða í byrjun næsta árs til þess að hægt verði að þjálfa starfsfólkið fyrir næstu sumarvertíð.