Stærstu hafnarkranar landsins komu til landsins í dag þegar skipið Happy Dover lagðist að bryggju á Reyðarfirði. Eimskipafélag Íslands hf. keypti kranana tvo, sem eru að gerðinni TREX Gottwald GHMK 6507, fyrr á þessu ári.
Kranarnir geta lyft tveimur tuttugu feta gámum samtímis, en þeir eru rafknúnir og því umhverfisvænni en eldri olíuknúnir kranar og er það í samræmi við umhverfisstefnu Eimskipafélagsins, sem miðar að því að lágmarka kolvtísýringsútblástur í starfseminni, að því er segir í fréttatilkynningu.
Annar kraninn verður staðsettur í Mjóeyrarhöfn en hinn á Grundartanga og mun sá síðarnefndi meðal annars verða nýttur til að þjónusta álver Norðuráls.