Hönnunarvörur og handverk um 400 íslenskra handverksmanna og -kvenna eru seldar í verslun Rammagerðarinnar í flugstöð Leifs Eiríkssonar. Sala þar hefur aukist um 20-25% síðasta árið og þufti að fjölga starfsfólki í versluninni í sumar umfram fyrri áætlanir. Þetta segir Lovísa Óladóttir, framkvæmdastjóri Rammagerðarinnar.

Um helgina gagnrýndi Eyjólfur Pálsson, forstjóri Epal, forsvarsmenn Isavia fyrir val á verslunarrýmum í flugstöðinni síðasta vetur og sagði að forsvarsmenn fyrirtækisins væru væntanlega að uppgötva að þeir hefðu gert mistök í valinu. Var Epal ein þeirra búða sem hafði verið fyrir í flugstöðinni, en var ekki valin í útboðinu. Lýsti hann áhyggjum sínum af skorti á íslenskri hönnun og handverki í flugstöðinni. Eyjólfur sagði einnig að breytinga væri að vænta á ákvörðun Isavia, en Isavia hefur slegið á slíkar hugmyndir.

Í tilkynningu frá Rammagerðinni er því vísað á bug að þessi skortur sé til staðar og bent á að Rammagerðin hafi ríflega 220 fermetra verslunar- og sýningarsvæði sem reynt sé að nýta til að gera íslenskri hönnun hátt undir höfði.

„ Rammagerðin er í samstarfi við meira en fjögur hundruð handverksmenn og –konur, um allt land, sem í gegnum okkur fá aðgang að þessum stóra markaði sem flugstöðin er. Þessi tala, 400, hljómar kannski ótrúlega í eyrum sumra en við erum búin að vera að vinna með íslensku handverksfólki í áratugi og reksturinn hefur að stóru leyti byggst upp í kringum endursölu á framleiðslu þessara mörgu smáu aðila um land allt,“ er haft eftir Lovísu í tilkynningunni.

Rammagerðin hefur verið með aðstöðu í flugstöðinni síðan 1970, en rekstur fyrirtækisins og sala á íslenskum hönnunarvörum til ferðamanna nær alla leið aftur til 1940.

Tengdar fréttir

Verslunarrýmið í Leifsstöð

Perla Ösp ráðin framkvæmdastjóri Eflingar

• Kæra Isavia á ný
• Isavia: Engar geðþóttaákvarðanir
• Gáttuð á vinnubrögðunum
• Þrjú fyrirtæki íhuga skaðabótamál

» Fleiri tengdar fréttir

• Blogga um frétt