Bandarískar hlutabréfavísitölur hækkuðu um meira en 2% þegar markaðir opnuðu vestanhafs eftir hádegi í dag. Dow Jones vísitalan hækkaði um 2,10%, S&P 500 um 2,07% og Nasdaq um 2,15%.

Í Evrópu lækkuðu hlutabréf hins vegar í verði. FTSE 100 hlutabréfavísitalan í Lundúnum fór niður um 1,4% og í París og Frankfurt lækkuðu hlutabréf um 1,3% og 1,2%.

Sérfræðingar búast við því að áfram verði óróleiki á hlutabréfamörkuðum, að minnsta kosti þar til peningastefnunefnd Seðlabanka Bandaríkjanna kemur saman í næsta mánuði og tekur ákvörðun um hvort hún hækki stýrivexti bankans.

Michael Hewson, markaðsgreinandi hjá CMC Markets, telur að markaðir verði áfram óstöðugir þar til í september.

„Þetta eru tegundir af sveiflum sem við sáum seinast árið 2008,“ segir hann.

Hann býst ekki við því að stýrivextir verði hækkaðir í Bandaríkjunum í næsta mánuði, meðal annars vegna þess að hlutverk seðlabankans sé að viðhalda fjármálastöðugleika.

„Ég held að þeir yrðu algjörlega klikkaðir að hækka vextina núna,“ segir hann.

Tengdar fréttir

Óróleiki á hlutabréfamörkuðum

Seðlabankinn rannsakar verklag söluráðgjafa

• Verðlækkun á mörkuðum
• Hiksti í Kína sendir óróleikabylgju
• Umtalsverð hækkun á mörkuðum
• Aukin bjartsýni meðal fjárfesta

» Fleiri tengdar fréttir

• Blogga um frétt