Greiningardeild Arion banka spáir því að vísitala neysluverðs muni standa í stað í september en gangi spáin eftir mun ársverðbólgan hækka í 2,4 prósent. Til lengri tíma litið er nokkur verðbólguþrýstingur talinn vera í kortunum en á sama tíma er talið að styrking krónunnar og afnám tolla á föt og skó muni halda aftur af verðbólgu til skemmri tíma.

Helstu liðir sem hækka í september að mati Greiningardeildar Arion eru föt og skór sökum þess að sumarútsölur ganga til baka, en einnig hækkar húsnæði og tómstundir og menning.

Á móti vegur að flugliðurinn lækkar og vegur þar lækkun flugfargjalda til útlanda þyngst. Einnig lækkar eldsneytisverð en olíufélögin hafa lækkað verð á bensíni umtalsvert undanfarna mánuði vegna lækkunar olíuverðs á heimsmarkaði og styrkingu krónunnar.

„Þótt verðbólguþrýstingur sé framundan bæði vegna verulegra launahækkana og einnig aukningu ráðstöfunartekna vegna lækkunar á tekjuskatti á næsta ári eru aðrir þættir sem vega á móti og draga úr aukningu verðbólgu til skemmri tíma,“ segir Greiningardeildin.

Þar er helst að nefna hraða styrkingu á gengi krónunnar undanfarið en gengisvísitalan hefur styrkst um 3,6% frá byrjun júlí. Einnig mun afnám tolla á föt og skó hafa áhrif en í kynningu fjárlagafrumvarpsins kom fram að lækkun á fatnaði og skóm gæti orðið um 13%.

Vigt undirliðarins í vísitölu neysluverðs er 4,46% og miðað við það gætu áhrif á ársverðbólgu orðið á bilinu 0,5% til 0,6% til lækkunar. Afnám tolla tekur gildi um áramótin eða á sama tíma og útsölur hefjast og getur því orðið erfitt að mæla nákvæmlega hver áhrif af afnámi tollana verða.

Tengdar fréttir

Ísland og ESB semja um tolla

Vill frekari tollalækkanir

• Nautakjöt bara framleitt í útlöndum
• Samningarnir komi á versta tíma
• „Þetta er eitthvað baktjaldamakk“
• Samningurinn „tvíeggja sverð“

» Fleiri tengdar fréttir

• Blogga um frétt