Fimmtíu ára sögu Fokker lýkur

Flugfélag Íslands vinnur nú að breytingu á flugflota félagsins en í byrjun næsta árs verður fyrsta Bombardier Q400 flugvél félagsins tekin í notkun.

Í tilkynningu frá félaginu segir að breytingunum verði lokið á fyrri hluta árs 2016 og lýkur þá fimmtíu ára sögu Fokker flugvéla hjá Flugfélagi Íslands. Fokker hætti framleiðslu á flugvélum sínum fyrir nokkrum árum.

Þær Fokker flugvélar sem Flugfélag Íslands hefur haft í rekstri undanfarin ár verða á næstunni seldar og hefur nú verið gengið frá sölu á einni Fokker 50 vél til Compagnie Africaine d‘Aviation.

Afhending vélarinnar hefur farið fram en Flugfélag Íslands aðstoðaði kaupendur með að ferja vélina til Ítalíu. Eftir í flota Flugfélags Íslands eru þá fjórar Fokker 50 sem gert er ráð fyrir að nota þar til Bombardier vélarnar verða komnar í flotann í byrjun næsta árs.

• Blogga um frétt