Trump sakaður um skattaundanskot

Donald Trump, væntanlegur forsetaframbjóðandi repúblikana, skrifaði undir fjárfestingasamning sem íslenska fjárfestingafélagið FL Group og alþjóðlega fasteignafélagið Bayrock Group gerðu sín á milli árið 2007. Markmiðið með fjárfestingunni, sem var síðar breytt í lán, er sagt vera að komast hjá skattgreiðslum í Bandaríkjunum.

Breska blaðið Daily Telegraph birti í dag ítarlega fréttaskýringu um viðskipti félaganna tveggja. Um var að ræða fimmtíu milljóna dala, sem jafngildir um 6,3 milljörðum króna, samning sem félögin gerðu sín á milli en í samningnum var gerð krafa um samþykki Donalds Trump.

Sem kunnugt er fjárfesti FL Group í fjórum fasteignaverkefnum í Bandaríkjunum árið 2007, þar á meðal í byggingu Trump Soho-turnsins. Það var gert í samstarfi við Bayrock Group.

Fréttaskýring Daily Telegraph byggist á gögnum sem fjölmiðillinn hefur undir höndum og varða viðskiptin. Í einu skjali kemur meðal annars fram að Trump hafi staðfest fjárfestingu FL Group í Bayrock í aprílmánuði 2007. Fáeinum vikum síðar var fjárfestingunni hins vegar breytt í lán.

Það hafi verið gert til þess að komast hjá milljóna dala skattgreiðslum í Bandaríkjunum. FL Group hefði þurft að greiða 40% skatt af fjárfestingunni, samkvæmt bandarískum skattalögum, en þar sem henni var breytt í lán þurfti félagið ekki að greiða neinn skatt.

Donald Trump samþykkti þessi viðskipti, eins og gögn Daily Telegraph sýna, með undirskrift sinni. Hann átti hlut í hótelverkefnunum, þar á meðal 15% hlut í hótelinu í Soho á Manhattan í New York.

FL Group fjárfesti í fjórum fasteignaverkefnum í Bandaríkjunum árið 2007. mbl.is/Sverrir Vilhelmsson

Alan Garten, lögmaður hans, þvertekur þó fyrir það að Trump hafi komið nálægt viðskiptunum. Undirskrift hans staðfesti aðeins þátttöku hans sem lítils hluthafa í verkefnunum. „Hann var ekki að samþykkja neitt.“

Bayrock hefur jafnframt vísað ásökununum á bug og sagt þær tilhæfulausar. Bandarísk skattayfirvöld hefðu á sínum tíma farið yfir viðskiptin og ekki séð neitt athugavert við þau.

Fasteignaverkefnin sem um ræðir voru eftirtalin:

Trump Soho – Fimm stjörnu hót­el í Soho-hverf­inu á Man­hatt­an í New York í sam­starfi við Don­ald Trump og Sap­ir Org­an­izati­on.

Trump Lau­der­dale – Fimm stjörnu hót­el á strönd Fort Lau­der­dale í sam­starfi við Don­ald Trump.

Whitest­one New York – Þróun þrettán ekru landsvæðis í Whitest­one, Qu­eens. Bayrock myndi í fram­hald­inu byggja fjölda lúx­usíbúða á svæðinu.

Ca­mel­back – Fimm stjörnu hót­el í Phoen­ix.

Í til­kynn­ingu frá FL Group sagði að áætlað væri að verk­efn­un­um yrði lokið inn­an þriggja ára. Fjár­fest­ing­in yrði fjár­mögnuð með eig­in fé og láns­fé.

Í kaup­hall­ar­til­kynn­ingu sem FL Group sendi frá sér árið 2007 var haft eft­ir Hann­esi Smára­syni, þáver­andi for­stjóra fyr­ir­tæk­is­ins, að sam­starfið við Bayrock félli vel að stefnu FL. Þá stefnu sagði hann meðal ann­ars miðast við leit að spenn­andi og ögr­andi verk­efn­um: „Fast­eigna­markaður­inn er spenn­andi vett­vang­ur, þar sem mik­il sam­keppni rík­ir en hann býður jafn­framt upp á mörg og marg­vís­leg tæki­færi. Við hlökk­um til sam­starfs­ins við þetta virta fyr­ir­tæki, bæði á Banda­ríkja­markaði og alþjóðleg­um mörkuðum,“ sagði Hann­es.

Kristján Kristjáns­son, sem þá var upp­lýs­inga­full­trúi FL Group, sagði í sam­tali við Viðskipta­blaðið 23. maí 2007 að Bayrock hefði verið aðaldrif­kraft­ur­inn í aðdrag­anda þess að fyr­ir­tæk­in tvö hófu sam­starf. Um­fjöll­un ís­lenskra fjöl­miðla um sam­starf FL Group og Bayrock var ekki mik­il eða áber­andi á sínum tíma. 

FL Group dró sig úr verkefnunum árið 2008, sem og flestum fasteignaverkefnum sínum erlendis.

Frétt The Independent

• Blogga um frétt