Gengi rafræna gjaldmiðilsins bitcoin féll um meira en 10% eftir að tölvuþrjótar hökkuðu sig inn í netkerfi Bitfinex, kauphallarinnar í Hong Kong, og stálu bitcoin-einingum að andvirði 65 milljóna dala. Það jafngildir um 7,7 milljörðum íslenskra króna.

Talsmaður Bitfinex sagði í samtali við fréttastofu Reuters í morgun að tölvuþrjótarnir hefðu stolið næstum því 120 þúsund bitcoin-einingum.

Í kjölfarið voru viðskipti í kauphöllinni stöðvuð en þau verða ekki leyfð á ný fyrr en rannsókn málsins lýkur.

Í yfirlýsingu á vefsíðu sinni sögðust forsvarsmenn Bitfinex hafa miklar áhyggjur af ráninu. Þeir liti það mjög alvarlegum augum og muni gera allt sem í valdi þeirra stendur til þess að leysa málið og tryggja að svona komi ekki aftur fyrir.

Ránið er eitt það stærsta í sögu rafræna gjaldmiðilsins. Eins og kunnugt er var Mt. Gox-kauphöllin í Japan rænd árið 2014, en þá var 744.408 bitcoin-einingum stolið.

Eftir að fregnir bárust af ráninu í nótt hríðféll gengi gjaldmiðilsins um 20%. Það hækkaði þó aftur á ný, en samtals nemur lækkunin um 10%. Stendur gengið nú í um 540 dölum.

Frétt BBC

Tengdar fréttir

Rafmynt

Hlýtur 11 þúsund ára fangelsisdóm

• Sektuð fyrir að greina ekki frá launuðum auglýsingum
• Tækifæri myndast á markaði
• Loka á eina stærstu rafmyntakauphöll heims
• Ímynd Musk notuð til þess að blekkja grunlausa

» Fleiri tengdar fréttir

• Blogga um frétt