Hagnaður Íslandsbanka nam 13 milljörðum króna eftir skatta á fyrri helmingi ársins 2016 samanborið við 10,8 milljarða króna hagnað á sama tímabili 2015. Afkoman skýrist af sterkum grunntekjum og einskiptishagnaðar vegna sölu Borgunar á hlutabréfum í Visa Europe.

Aukning í hreinum fjármunatekjum skýrist af því að samkomulag um sölu á hlutabréfum í Visa Europe var í höfn á öðrum ársfjórðungi, sem skilaði 6,2 milljörðum kr. í rekstur.

„Afkoma Íslandsbanka á fyrri árshelmingi var góð og staða bankans sterk. Hagnaður tímabilsins var um 13 milljarðar og arðsemi eiginfjár 12,9%. Aukning hagnaðar skýrist að miklu leyti af tekjum frá dótturfélagi bankans, Borgun,“ er haft eftir Birnu Einarsdóttur, bankastjóra Íslandsbanka, í fréttatilkynningu.

Áfram unnið að fækkun útibúa

„Útlánavöxtur nemur 5% á fyrstu sex mánuðum ársins og hafa lánveitingar verið til fjölbreyttra atvinnugreina.“ Áfram verður unnið að fækkun útibúa bankans og er gert ráð fyrir að útibú Íslandsbanka verði 14 í upphafi árs 2017.

Arðsemi eigin fjár var 12,9% samanborið við 11,7% á sama tímabili í fyrra. Hagnaður af reglulegri starfsemi var hins vegar lægri en á fyrri hluta 2015 og nam hann átta milljörðum króna í stað 8,2 milljörðum ífyrra.

Hreinar vaxtatekjur bankans voru 15,9 ma. kr.  sem er aukning um 17,3% og vaxtamunur var 3,1%. Hreinar þóknanatekjur voru 6,7 ma. kr., sem er 4,3% aukning milli ára.

Um 1,2 milljarða einskiptiskostnaður var vegna skemmda á höfuðstöðvum bankans á Kirkjusandi.

Útlán námu tæpum 700 milljörðum króna

Útlán til viðskiptavina jukust um 5,0% frá áramótum og námu 698,7 milljörðum króna á fyrri árshelmingi 2016.

Heildareignir bankans voru 1.030 ma. kr. í lok tímabilsins og innlán frá viðskiptavinum lækkuðu um 4,6% og voru 566 ma. kr. í lok tímabilsins.

Tilkynning Íslandsbanka

Tengdar fréttir

Borgun

Von á ákvörðun um matsmenn í Borgunarmáli

• Hvatti til breytts verklags
• Ekkert sem bendir til lögbrots
• Frávísunarkröfu Borgunar hafnað
• Engar vísbendingar um leka

» Fleiri tengdar fréttir

• Blogga um frétt