Viðskipti | mbl | 8.10.2016 | 20:26 | Uppfært 23:00

Íslenskt app í Xbox

Hjónin Pratik Kumar og Kristín Ósk Óskars. Ljósmynd/Aðsend

Nú er hægt að fá appið AirServer á Xbox og er þetta fyrsta íslenska appið sem kemst á þann markað. AirServer veitir notendum sínum þá leið til þess að spila leiki á farsíma á Xbox One-tölvu. Einnig er hægt að nota appið til þess að spila tónlist af Spotify og Apple Music eða horfa á sjónvarp í gegnum Xbox One-tölvu.

Framleiðandi AirServer er fyrirtækið App Dynamic ehf. sem stofnað var af hjónunum Pratik Kumar og Kristínu Ósk Óskars árið 2011.

AirServer er með rúmlega tvær milljónir notenda og er það helst notað í kennslustofum þar sem kennarar geta sent myndir frá spjaldtölvum upp á stóran skjá eða töflu.

Fyrri frétt mbl.is: Íslenskt „app“ slær í gegn

AirServer er svokallað AirPlay app sem virkar á Mac, PC og Xbox-tölvur. Appið er hugsað sem lausn fyrir notendur sem streyma efni milli tækja og opnar þannig aðgang að kvikmyndum, ljósmyndum, tónlist og persónulegum myndböndum.

Gríðarleg velgengni síðustu ár

Í samtali við mbl.is segir Pratik að velgengni AirServer fyrir Mac og PC tölvur hafi verið gríðarleg síðustu ár og er App Dynamic ehf. nú orðið mjög arðsamt fyrirtæki. Segir Pratik að koma AirServer á Xbox-markaðinn skapi aðra sterka tekjuleið fyrir fyrirtækið. „Við höfum fundið fyrir gríðarlegum áhuga frá þeim sem spila tölvuleiki í gegnum þessi tæki og sjálfu Microsoft og kom það okkur svolítið á óvart,“ segir Prakit í samtali við mbl.is.

Hann hefur nú fengið staðfest frá verkefnastjóra Xbox að AirServer verði auglýst í sjálfri Xbox-„versluninni“ þar sem notendur Xbox kaupa öpp. „Það þýðir að ef þú skoðar Xbox-verslunina sérðu AirServer á forsíðunni. Það hefur orðið til þess að salan hefur stóraukist,“ segir Pratik. Þess má geta að AirServer er eina appið í Xbox-versluninni sem þarf að borga fyrir en hægt er að frá appið fyrir 20 bandaríkjadali eða um 2.300 íslenskar krónur.

Heimasíða AirServer