Tvö félög sem keyptu hlutabréf í Landsbanka Íslands hf. á árunum 2006 og 2007 hafa stefnt Björgólfi Thor Björgólfssyni til greiðslu skaðabóta vegna tjóns sem félögin urðu fyrir vegna kaupanna. Um er að ræða félögin Vogun hf. og Fiskveiðahlutafélagið Venus hf. en málin verða þingfest í Héraðsdómi Reykjavíkur þann 1. nóvember næstkomandi.

Bæði félögin tóku þátt í hópmálsókn hluthafa Landsbanka Íslands gegn Björgólfi Thor sem var vísað frá dómi með dómi Hæstaréttar þann 2. maí. Í fréttatilkynningu segir að þau hafi nú ákveðið að láta reyna á rétt til skaðabóta í sjálfstæðum málum. Byggir málsókn þeirra á sömu rökum og grundvelli og fyrri hópmálsókn.

Telja stjórnir félaganna að fram komin gögn gefi sterklega til kynna að Björgólfur Thor hafi með saknæmum hætti komið í veg fyrir að hluthafar í Landsbanka Íslands hf. hafi fengið upplýsingar um umfangsmiklar lánveitingar tengdar honum og einnig að hann hafi brotið gegn reglum um yfirtökuskyldu eftir að Samson eignarhaldsfélag hf. náði yfirráðum yfir Landsbankanum.

Telja félögin að Landsbanki Íslands hf. hafi verið undir fullum yfirráðum Samson eignarhaldsfélags hf. frá miðju ári 2006, en við þær aðstæður hafi yfirtökuskylda stofnast. Hafi Björgólfur Thor sem stjórnarformaður Samson látið undir höfuð leggjast að bregðast við yfirtökuskyldu sem á félaginu hvíldi og með þeirri vanrækslu bakað sér bótaábyrgð gagnvart hluthöfum.

Tengdar fréttir

Hópmálsókn gegn Björgólfi

Fallist á vanhæfiskröfu Björgólfs Thors

• Málið gegn Björgólfi tefst vegna meints vanhæfis
• Aðalmeðferð í máli gegn Björgólfi á næsta ári
• Hópmálsóknin aftur til héraðs
• Hópmálsókn gegn Björgólfi vísað frá

» Fleiri tengdar fréttir

• 1 blogg um fréttina

Bloggað um fréttina

• Jóhann Elíasson: HANN ER HÁLL SEM ÁLL