Horn kaupir Hópbíla og Hagvagna

Framtakssjóðurinn Horn III hefur keypt fyrirtækin Hópbíla og Hagvagna samkvæmt heimildum ViðskiptaMoggans. Seljendur eru Gísli J. Friðjónsson, forstjóri fyrirtækisins, og tengdir aðilar.

Hagvagnar hafa annast akstur á vegum Strætó, samkvæmt samningi, einkum til og frá höfuðborgarsvæðinu. Hópbílar er umsvifamikið fyrirtæki í rekstri hópferðabifreiða.

Í ársreikningi fyrir árið 2015 kemur fram að velta ársins losaði 1,6 milljarða króna. Hagnaður ársins var 273 milljónir. Athygli vekur að meðal tekjuliða er liðurinn „Sala; strætó“ og nemur hann 538 milljónum, þá eru færðar á liðinn „Akstursþjónusta fatlaðra“ 604 milljónir.

Í efnahagsreikningi eru bifreiðar og tæki bókfærð á 641 milljón króna og eigið fé 601 milljón króna, að því er fram kemur í ViðskiptaMogganum í dag.