Bretar velja netverslun umfram verslanir

Meira en helmingur allrar sölu á svokölluðum svörtum föstudegi í Bretlandi fór í gegnum netverslanir. Talsvert minna var um kaupendur í verslunum en gert hafði verið ráð fyrir.Í heild nam kortavelta í Bretlandi á þessum annasama verslunardegi 1,27 milljörðum punda, eða sem nemur um 180 milljörðum íslenskra króna.

57% kortavelunnar kom í gegnum netverslanir samkvæmt upplýsingum greiningarfyrirtækisins Salmon samkvæmt frétt Guardian. Salan í heildina jókst um tugi prósent hjá mörgum stórum verslunarkeðjum miðað við söluna í fyrra.

Tilhneigingin síðustu sex ár, síðan svari föstudagurinn kom upphaflega til Bretlands, hefur þó verið á þá leið að færri koma í verslanir og fleiri nota snjallsíma og tölvur til að gera innkaupin.

Salmon greiningarfyrirtækið segir að frá miðnætti og til klukkan níu um morguninn hafi t.d. 75% af allri kortaveltu verið í gegnum netið, þrátt fyrir að margar verslanir hafi opnað á miðnætti eða mjög snemma um morguninn. Inn í þetta spilar reyndar að talsvert var um kaup íbúa annarra landa í vefverslunum vegna veikingar pundsins. Gátu því margir sem notast alla jafna við evru eða Bandaríkjadal því gert enn betri kaup en annars.

• Blogga um frétt