Opna Gló í Kaupmannahöfn

Gló mun opna nýjan veitingastað í Magasin du Nord við Kongens Nytorv í Kaupmannahöfn í júní. Veitingastaðurinn verður sá stærsti í Magasin og staðsettur í matarkjallara verslunarkeðjunnar. Þetta verður fimmti veitingastaður Gló og sá fyrsti utan Íslands. Er þetta fyrsta skref Gló í átt að frekari útbreiðslu staðarins utan Íslands.

Þetta kemur fram í tilkynningu frá Gló.

„Magasin leitaði til okkar fyrir um tveimur árum með þá hugmynd að byggja upp og reka veitingastað í nafni Gló í Magasin du Nord. Síðan þróaðist hugmyndin og nú höfum við gengið frá samningum og uppbyggingin er framundan. Þetta er afar spennandi verkefni og mikil viðurkenning á okkar starfi og þeirri hugmyndafræði sem Solla hefur lagt áherslu á að kynna hér heima og erlendis,” er haft eftir Elíasi Guðmundssyni einum eigenda Gló.

Veitingastaður Gló í Magasin verður 260 fermetrar að flatarmáli. Útlit, mörkun og áherslur á staðnum voru unnar með M Worldwide, breskri hönnunarstofu sem sérhæfir sig í hönnun verslana, í samstarfi við Hvíta húsið. M Worldwide hefur unnið með stórum alþjóðlegum fyrirtækjum á borð við Apple, Sainsbury’s, Vodafone og fleirum.

Veitingastaður Gló í Magasin verður fimmti veitingastaður fyrirtækisins. Gló rekur nú þegar fjóra veitingastaði en staðurinn er í eigu Birgis Bieltvedt, Eyglóar Bjarkar Kjartansdóttur, Sólveigar Eiríksdóttur og Elíasar Guðmundssonar. 

Staðurinn verður 260 fermetrar að flatarmáli.

• Blogga um frétt