Forstjóri ísraelska lyfjafyrirtækisins Teva, Erez Vigodman, er að láta af störfum segir í tilkynningu frá lyfjafyrirtækinu. 

Teva Pharmaceutical Industries er stærsta samheitalyfjafyrirtæki heims en í fyrra keypti fyrirtækið Actavis.  Í desember var greint frá því að Sig­urður Óli Ólafs­son hafi látið af starfi for­stjóra sam­heita­lyfja­sviðs Teva og að hann muni hætta störfum hjá Teva í lok mars. Við starfi hans hef­ur tekið Dip­ann­k­ar Bhattachar­jee, sem áður gegndi stöðu for­stjóra yfir Evr­ópu­hluta sam­heita­lyfja­sviðs Teva. Sig­urður Óli hafði gegnt for­stjóra­starf­inu hjá Teva frá ár­inu 2014 og kom þangað frá Acta­vis. 

Markaðsvirði Teva hefur lækkað mjög undanfarið ár en Vigodman hefur verið forstjóri Teva í þrjú ár. Hann segir í tilkynningu að hann telji rétt að láta af störfum núna. Það hafi verið forréttindi að stýra Teva og hann sé stoltur af því sem stjórnendur fyrirtækisins hafa áorkað. 

Í tilkynninu kemur fram að stjórnarformaður Teva, Yitzhak Peterburg, tekur tímabundið við sem forstjóri fyrirtækisins. 

Samkvæmt ísraelskum fjölmiðlum ákvað stjórn félagsins að krefjast afsagnar Vigomans þar sem ákvarðanir hans fyrir hönd fyrirtækisins að undanförnu hafi dregið úr trú fjárfesta á félaginu.