Viðskipti | mbl | 22.6.2017 | 11:48 | Uppfært 15:04

„Ekki eftir neinu að bíða“

Benedikt Jóhannesson, fjármála- og efnahgasráðherra, kynnti tillögurnar í morgun fyrir blaðamönnum og embættismönnum. mbl.is/Hanna

„Það er ekki eftir neinu að bíða, við höfum sagt að við ætlum að koma fram með lagafrumvarp strax í haust um þessi mál,“ sagði Benedikt Jóhannesson fjármála- og efnahagsráðherra eftir blaðamannafund í ráðuneytinu í morgun.

Frétt af mbl.is

10.000 króna seðillinn úr umferð

Á fundinum voru kynntar skýrslur tveggja starfshópa sem í vetur var falið að vinna tillögur að aðgerðum til úrbóta vegna ábendinga sem fram komu í skýrslu starfshóps um umfang fjármagnstilfærslna og eignaumsýslu Íslendinga á aflandssvæðum.

„Sumt af þessu er ekkki eingöngu bundið við fjármálaráðneytið, við erum í samvinnu við dómsmálaráðuneytið um peningaþvætti, atvinnuvegaráðuneytið í sambandi við hlutafélagalög og velferðarráðuneytið um keðjuábyrgð. Þetta er átak á mörgum stöðum og nú liggur í loftinu að fólk ætli að kýla á þetta.“

Margar tillögur eru lagðar fram í skýrslunum og efast Benedikt um að hægt verði að afgreiða þær allar fyrir haustið. Sumum tillögum þurfi ef til vill að breyta því huga þurfi að persónuverndarsjónarmiðum og hversu íþyngjandi þær yrðu.

„Ég er ekki viss um að við náum öllum atriðunum fyrir haustið en nú er þetta komið á blað og orðinn gátlisti. Sumt snýst þetta um verklag innan stofnana og það er auðveldara að eiga við það. Allar stofnanir sem koma málinu við vilja ná tökum á þessu og fagna því að það sé að koma nýtt og auðveldara regluverk.“

Skattkerfið verði einfaldað enn frekar

Í skýrslunni kemur fram að mikilvægt sé að fækka undanþágum frá almenna virðisaukaskattsþrepinu og minnka bilið á milli skattþrepa eða sameina þau þar sem mismunandi virðisaukaskattsþrep eru meðal þess sem eykur hvata til undanskota. Benedikt segir að frekari einföldun virðisaukaskattkerfisins sé til skoðunar hjá ráðuneytinu.

„Þessi almennu sannindi að það er mun auðveldara að fylgjast með þessu eftir því sem fleiri eru í almenna þrepinu og því lægra er hægt að hafa það. Menn þekkja tillögur okkur um breytingar á skattþrepi ferðaþjónustunnar. Það var skref í þessa átt og nú eru að verða tiltölulega fáir flokkar eftir í 11% þrepinu.“

Erfiðara að svindla á starfsmönnum

Benedikt bætir við að útreikningar sýni að ef allir sem borguðu einhvern virðisaukaskatt væri í einu þrepi væri hægt að hafa hann í kringum 19 til 20%. Ef settur yrði viðrisaukaskattur á alla starfsemi væri hægt að hafa hann milli 18 til 19%. Þá tekur hann vel í tillögurnar um að takmarka notkun reiðufjár.

„Þetta snýst líka um að hafa eftirlit með launagreiðanda þannig að hann svindli ekki á starfsmönnunum. Það eru uppi grunsemdir um að erlendir starfsmenn séu ekki að vinna hér eftir innlendum kjarasamningum. Þetta er mun erfiðara eftir því sem heimurinn verður rafrænni.“