Vinnueftirlitið hefur bannað alla vinnu við byggingarframkvæmdir í Mosagötu 4-12 í Urriðaholti í Garðabæ þar sem lífi og heilbrigði starfsmanna var talin hætta búin.
Við eftirlitsheimsókn Vinnueftirlitsins á byggingarvinnustað kom í ljós að aðbúnaður, hollustuhættir og öryggi starfsmanna var ekki í samræmi við lög og reglur.
Vinnueftirlitið taldi fallvarnir á vinnupöllum, bæði utanhúss og innanhúss, ófullnægjandi. Þá voru verkamenn á staðnum hvorki með hjálma né í öryggisskóm.
Bannið gildir uns búið er að gera úrbætur og Vinnueftirlitið hefur leyft vinnu þar á ný. Þrátt fyrir framangreint bann er heimilt að vinna að úrbótum.