„Leiðakerfið vestur um haf er í raun orðið ótrúlega öflugt. Það er aðeins British Airways sem býður upp á fleiri áfangastaði en við í Norður-Ameríku,“ er haft eftir Björgólfi Jóhannssyni, forstjóra Icelandair Group, í ViðskiptaMogganum í dag.
Hann segir að félagið sæki nú fram í kjölfar mikillar uppstokkunar á skipulagi þess. Meðal þess sem nú sé skoðað sé að hefja flug inn á nýja og fjarlægari markaði.
„Við erum einnig að skoða ákveðna möguleika í Asíu og einnig að fara dýpra inn í Evrópu. Asía er spennandi, líkt og Afríka að því marki að þar er vöxturinn gríðarlegur. Það er að skapast eftirspurn eftir flugi til og frá þessum heimsálfum og við viljum skoða möguleika á því að sækja sneið af þeirri köku, annað hvort sjálf eða í samstarfi við aðra aðila.“