FME varar við bitcoin

Fjármálaeftirlitið segir mikla áhættu fylgja viðskiptum með sýndarfé, eins og bitcoin, og varar neytendur við að fjárfesta í sýndarfé og hætta þannig fjármunum sem þeir mega ekki við því að tapa nema að mjög vel athuguðu máli.

Þetta kemur fram á heimsíðu Fjármálaeftirlitsins. Þar segir að verð á sýndarfé hafi sveiflast gríðarlega undanfarið ár og hafi miklar lækkanir fylgt í kjölfarið á miklum hækkunum. Þeir sem kaupa sýndarfé eigi á hættu á að tapa stórum hluta fjárfestingar sinnar.

Taldir eru upp fjórir áhættuþættir. Í fyrsta lagi sé engin neytendavernd og engar reglur gildi á markaði með sýndarfé. Í öðru lagi sýni markaðurinn skýr merki um bólumyndun og í þriðja lagi þurfi markaðirnir ekki starfsleyfi. Verðgagnsæi hafi verið ábótavant og sumir þeirra hafi lent í rekstrarvanda. Í fjórða lagi séu sýndarmyntir ekki studdar af undirliggjandi eignum né af seðlabönkum. 

• Blogga um frétt