Róbert Wessman á tilkall til ríflega 22% hlutar í lyfjafyrirtækinu Alvogen sem hann stofnaði í félagi við samstarfsmenn sína árið 2009. Hingað til hefur því verið haldið fram að Róbert eigi ekki hluti í fyrirtækinu.
Eignarhald hans hefur nú fengist staðfest á grundvelli gagna sem Morgunblaðið hefur aflað. Skjölin staðfesta að eignarhaldið teygir sig um flókið net eignarhaldsfélaga sem teygja sig frá Íslandi til Jersey, Lúxemborgar, Svíþjóðar og Bandaríkjanna.
Gengi hlutabréfa í Alvogen er ekki skráð opinberlega. Fréttaveitan Bloomberg hefur það hins vegar eftir heimildarmönnum innan fyrirtækisins að það sé metið á um 4 milljarða dollara. Sé það verðmat nærri raunveruleikanum má gera ráð fyrir að eignarhlutur Róberts, sem vistaður er í sjálfseignarsjóði á aflandseyjunni Jersey, sé metinn á allt að 90 milljarða króna.
Í Morgunblaðinu í dag er ljósi varpað á hið flókna og umfangsmikla net eignarhaldsfélaga sem rekja sig allt frá hinum ört stækkandi lyfjarisa og að sjálfseignarsjóðnum sem ætlað er að tryggja fjárhagslega velferð Róberts og fjölskyldu hans.