Mikið í húfi fyrir lífeyrissjóði vegna hótelsins

Íslenskir lífeyrissjóðir hafa beina aðkomu að uppbyggingu nýs lúxushótels við Austurhöfn í Reykjavík. Í byggingunni verður rekið Marriott Edition hótel í hæsta gæðaflokki. Allt stefnir í að framkvæmdir við hótelið muni fara milljarða fram úr áætlunum.

Frétt af mbl.is

Hótelið sífellt dýrara

Lífeyrissjóðirnir halda á, í félagi við aðra innlenda fjárfesta, tæplega 40% hlut í félaginu Cambridge Plaza Hotel Company ehf. sem á bygginguna. Meirihluti félagsins er hins vegar í eigu hollenska félagsins Cambridge Netherlands Investors B.V. Eigendur þess eru bandaríska fasteignaþróunarfélagið Carpenter & Company og fjárfestirinn Eggert Þór Dagbjartsson, að því er fram kemur í umfjöllun um þetta mál í Morgunblaðinu í dag.

Eignarhlutur lífeyrissjóðanna er vistaður í félaginu Mandólín ehf. Athygli vekur að sjóðastýringarfyrirtækið Stefnir er fyrirferðarmikið innan Mandólíns og lífeyrissjóðirnir eiga verulegra hagsmuna að gæta í gegnum sjóðinn SÍA III slhf. sem Stefnir rekur. Stefnir er í eigu Arion banka sem seldi byggingarréttinn undir hótelið og er jafnframt stærsti lánveitandinn að verkefninu. Lífeyrissjóðir eiga þó ekki aðeins hagsmuna að gæta í gegnum fjárfestingu sína í SÍA III heldur eru Almenni lífeyrissjóðurinn og Festa lífeyrissjóður einnig beinir eigendur að Mandólín.