Herbergjanýting hríðfellur

Herbergjanýting í apríl 2018 var 54,7%, sem er lækkun um 11,3 prósentustig frá apríl 2017 þegar hún var 66%. Á sama tíma hefur framboð gistirýmis aukist um 8,3% mælt í fjölda herbergja.

Þetta kemur fram í frétt á vef Hagstofu Íslands en þar kemur jafnframt fram að nýtingin í apríl hafi verið best á höfuðborgarsvæðinu, eða 65,7%.

Gistinætur ferðamanna á öllum gististöðumí apríl voru 534.700 samanborið við 576.600 í sama mánuði í fyrra. Það jafngildir 7% fækkun á milli ára. Gistinætur á hótelum í apríl síðastliðnum voru 276.300, sem er 6% samdráttur frá sama mánuði árið áður. Um 63% allra gistinátta voru á höfuðborgarsvæðinu eða 175.000.

Um 84% gistinátta á hótelum voru skráðar á erlenda ferðamenn. Erlendum gistinóttum fækkaði um 7% frá apríl í fyrra en gistinóttum Íslendinga fækkaði um 3%. Á tólf mánaða tímabili, frá maí 2017 til apríl 2018, var heildarfjöldi gistinátta á hótelum um 4.280.700 sem er 4% aukning miðað við sama tímabil árið áður.

Gistinætur á hótelum og gistiheimilum voru 344.700, gistinætur í gegnum vefsíður á borð við Airbnb 97.700, og 92.300 á öðrum tegundum gististaða. Til viðbótar voru gistinætur erlendra ferðamanna utan hefðbundinna gististaða áætlaðar 27.700 í apríl, þar af 11.600 í bílum og 16.100 hjá vinum og ættingjum, í gegnum húsaskipti eða á öðrum stöðum þar sem ekki var greitt sérstaklega fyrir gistingu.

• Blogga um frétt