Bandarískur fjárfestingasjóður hefur fest kaup á tæplega helmingshlut Sjóklæðagerðarinnar 66° Norður fyrir 30 milljónir evra eða um 3,7 milljarða íslenskra króna. Fyrirtækið hefur verið rekið með tapi síðustu ár og nam tapið 115 milljónum í fyrra, að því er kemur fram í umfjöllun Fréttablaðsins í dag.
Heildartekjur fyrirtækisins í fyrra eru nálægt kaupverðinu eða um 3,8 milljarðar króna og var EBITDA-hagnaður síðasta árs 161 milljón króna, 65 milljónum minna en árið á undan.
Haft er eftir Helga Rúnari Óskarssyni, forstjóra fyrirtækisins, að unnið hafi verið markvisst að því að leita fjárfesta til þess að tryggja fjármögnun á frekari uppbyggingu fyrirtækisins. Þá er talið að því ferli sé lokið með aðkomu fjárfestingasjóðsins að fyrirtækinu.