Rekstrartap (EBIT) flugfélagsins WOW air nam um 45 milljónum bandaríkjadala, jafngildi 4,8 milljarða íslenskra króna, á tólf mánaða tímabili frá júlí 2017 til júní 2018, að því er fram kemur í fjárfestakynningu sem Morgunblaðið hefur undir höndum.

Rekstrarspá fyrir árið 2018 í heild sinni gerir ráð fyrir rekstrartapi upp á 28 milljónir dala, sem nemur um 3 milljörðum íslenskra króna.

Eigið fé WOW air í lok júní var 14 milljónir dala, um 1,5 milljarðar króna. Skúli Mogensen, forstjóri og eigandi WOW air, vildi ekki tjá sig um efni kynningarinnar en hann leitar nú fjárfesta til að fjármagna félagið. Er ráðgert að ljúka fjármögnunarferlinu undir lok mánaðarins.

Í umfjöllun um mál þetta í Morgunblaðinu í dag segir, að samkvæmt kynningunni sé stefnt að útgáfu skuldabréfa fyrir 500-1000 milljónir sænskra króna, jafngildi 6-12 milljarða íslenskra króna, sem ætlað er til að endurfjármagna skuldir og brúa fjárþörf fram að frumútboði félagsins, sem stefnt er að innan 18 mánaða.

Tengdar fréttir

Sviptivindar í flugrekstri

Gefur Icelandair aukin tækifæri

• Verktökum í nýrri byggingu Icelandair boðið í kaffi
• Bláfugl sagt hafa skilað flugrekstarleyfi
• Ernir hyggst skila inn flugrekstrarleyfi
• Fjórtán segja upp hjá Play

» Fleiri tengdar fréttir