Viðskipti | mbl | 25.9.2018 | 11:20 | Uppfært 15:55

Airbnb-eignum tekið að fækka

Gistinóttum á Airbnb hefur fækkað fimm mánuði í röð á höfuðborgarsvæðinu. mbl.is/Golli

Eignum sem boðnar eru til leigu hér á landi á gistisíðunni Airbnb er tekið að fækka, að því er fram kom á morgunfundi Arion banka um ferðaþjónustuna, nú í morgun, og vísbending sé um að ferðamenn séu að færa sig úr Airbnb yfir í hótelgistingu.

Frétt af mbl.is

Spá mjög lítilli fjölgun ferðamanna

Þarna spilar inn í, að mati sérfræðings deildarinnar, sterkt raungengi, hert regluverk og aukin samkeppni við hótel. Allt þetta hafi mögulega dregið úr hvatanum til að leigja út eignir í gegnum Airbnb. Þá hafi hvati húseigenda til að selja fasteignir sínar í stað þess að leigja þær út, aukist vegna hækkandi fasteignaverðs.

Gistinóttum á Airbnb hefur nú fækkað fimm mánuði í röð á höfuðborgarsvæðinu, og síðustu tvo mánuði á landsbyggðinni.

Fjórar af hverjum tíu gistinóttum ferðamanna árið 2017 voru á hóteli, en spá deildarinnar gerir ráð fyrir því að fjöldi hótelherbergja á landinu verði sjö þúsund árið 2022.

AFP

Há hótelnýting í evrópskum samanburði

Hvað nýtingu hótelherbergja varðar eru nýtingarhlutföll á höfuðborgarsvæðinu mjög há í evrópskum samanburði. Til dæmis nefndi Þorsteinn Andri Haraldsson, sérfræðingur greiningardeildarinnar, að nýting hótelherbergja á höfuðborgarsvæðinu væri að jafnaði betri hér en á Norðurlöndunum. Þá sagði hann að skortur á framboði hótelherbergja hér á landi „skini í gegnum nýtingartölurnar“.

Framboðsskorturinn endurspeglist svo í verði herbergjanna, en þar á Ísland vinningin í samanburði við hin Norðurlöndin. Þá er meðalverð íslenskra hótelherbergja sambærilegt og í Amsterdam og í London.

Í máli Þorsteins kom einnig fram að átta ný hótel séu í byggingu í dag, og þeim gæti fjölgað um 20 á næstu árum, miðað við það sem er nú þegar áformað.

55 hótel voru á höfuðborgarsvæðinu í lok árs 2017, en Þorsteinn sagði útlit fyrir að hótelmarkaðurinn gæti stækkað um 40-50% á næstu árum. Þá kom fram í máli hans að árstíðarsveiflan í nýtingu hótelherbergja á landsbyggðinni væri að hverfa, en skýringuna megi einkum rekja til uppgangs á Suðurlandi og á Suðurnesjum.