Það liggur í augum uppi að líkur eru á að Icelandair Group muni ekki ná að uppfylla skilmála skuldabréfa félagsins þar sem það hefur lækkað EBITDA-spá sína nokkuð þar sem horf­ur í rekstri Icelanda­ir Group á ár­inu 2018 eru lak­ari en fé­lagið hafði gert ráð fyr­ir. Þetta segir Sigurður Örn Karlsson, greinandi hjá IFS.

Icelanda­ir Group tilkynnti í morgun að félagið mun í dag hefja viðræður við full­trúa skulda­bréfa­eig­enda sem ráða yfir meira en 50% af út­gefn­um óveðtryggðum skulda­bréf­um fé­lags­ins sem eru að nafn­v­irði 190 millj­ón­ir Banda­ríkja­dala, 21,5 millj­arðar króna. Viðræðurn­ar eru til­komn­ar vegna þess að lík­legt er að af­koma Icelanda­ir upp­fylli ekki skil­mála skulda­bréf­anna.

Frétt af mbl.is

Icelandair ræðir við lánardrottna

Erfiðleikar í flugrekstri ekki einskorðaðir við Ísland

Sigurður segir að ekki sé hægt að spá fyrir um niðurstöðu viðræðnanna en að nokkrir möguleikar séu í boði, líkt og fram komi í tilkynningunni.

„Félögin þurfa að sækja sér aukið fjármagn til að ráða við hækkandi olíuverð og mögulega hækkandi launakostnað. Staðan á markaðnum er erfið hvað þetta varðar,“ segir Sigurður, sem á von á frekari hagræðingu í fluggeiranum á næstu misserum. „Við lítum á það í heild sinni fyrir flugmarkaðinn, sérstaklega í Evrópu, að það eiga eftir að verða hagræðingar þar, sameiningar á flugfélögum,“ segir hann og bendir á að samþætting á flugmarkaði í Bandaríkjunum hefur verið meiri en í Evrópu upp á síðkastið.

„Það er ekki einskorðað við Ísland að það séu erfiðleikar í flugrekstri, það hefur verið gríðarleg framboðsaukning í flugi yfir Atlantshafið, sem hefur orsakað lægra flugverð þannig að við munum væntanlega sjá á komandi misserum frekari hagræðingar í flugbransanum í Evrópu.“

Sigurður segir að með frekari hagræðingu sækist flugfélögin eftir því að bæta stöðu félaganna gagnvart þróun á mörkuðum varðandi flugverð, olíuverð og aðra kostnaðarliði. „Hvort að íslensku félögin séu þar inn í myndinni er erfitt að segja til um.“

Erfitt að segja til um áframhaldandi lækkun hlutabréfa

Hluta­bréf í Icelanda­ir lækkuðu við upp­haf viðskipta í Kaup­höll­inni í morgun eft­ir að til­kynnt var um að fé­lagið myndi hefja viðræður við full­trúa skulda­bréfa­eig­enda. Í rúmlega 39 millj­óna viðskipt­um nú í morg­un hafa hluta­bréf Icelanda­ir lækkað um 3,29%.

Frétt af mbl.is

Hlutabréf í Icelandair lækka

Sigurður segir að erfitt sé að segja til um hvort von sé á frekari lækkun hlutabréfa í félaginu. „Þau eru búin að lækka mjög mikið á undanförnum mánuðum en það er erfitt að segja nákvæmlega til um það.“  

Tengdar fréttir

Sviptivindar í flugrekstri

Verktökum í nýrri byggingu Icelandair boðið í kaffi

• Bláfugl sagt hafa skilað flugrekstarleyfi
• Ernir hyggst skila inn flugrekstrarleyfi
• Fjórtán segja upp hjá Play
• Tilboð sem flugmenn Play þurfa að svara í dag

» Fleiri tengdar fréttir

• Blogga um frétt