Svipaður fjöldi og ári fyrr

Á nýliðnu ári sóttu um 1,3 milljónir gesta Bláa lónið heim en það er svipaður fjöldi og þangað lagði leið sína árið 2017.

Grímur Sæmundsen, forstjóri fyrirtækisins, segir það í raun ekki áhyggjuefni þótt gestum hafi ekki fjölgað milli ára. Mestu skipti að þjónusta fólk vel og tryggja góða upplifun. Þá sé markmiðið það að hafa meiri tekjur af hverri heimsókn fremur en að fjölga gestum stanslaust.

Á nýliðnu ári tók Bláa lónið í gagnið nýtt lúxushótel en þar kostar nóttin allt upp í 1,5 milljónir króna. Viðtökurnar hafa verið gríðargóðar að sögn Gríms. Tekjur fyrirtækisins jukust um fimmtung á nýliðnu ári, mælt í evrum en mun meira í íslenskum krónum, að því er fram kemur í ViðskiptaMogganum í dag.