Viðskipti | Morgunblaðið | 21.2.2019 | 5:30 | Uppfært 6:14

Draga Boeing og Airbus að borðinu

Þota af gerðinni Airbus. AFP

Icelandair Group hefur sent flugvélaframleiðendunum Boeing og Airbus erindi þar sem kallað er eftir formlegum viðræðum um möguleg kaup félagsins á nýjum þotum sem ætlað er að bætast við flota þess á komandi árum.

Miða viðræðurnar samkvæmt heimildum ViðskiptaMoggans að því að fá úr því skorið með hvaða hætti stórum hluta núverandi flota félagsins, þ.e. hinum svokölluðu 757-vélum frá Boeing, verður lagt og nýrri og sparneytnari vélar teknar í notkun í stað þeirra.

Á komandi vikum tekur Icelandair í notkun sex nýjar Boeing 737 MAX-vélar, en þær eru í hópi þeirra 16 véla þeirrar tegundar sem félagið tekur við á árabilinu 2018-2021. Þótt stjórnendur Icelandair muni vera mjög ánægðir með reynsluna af MAX-vélunum frá Boeing er ljóst að þær henta ekki til notkunar á alla áfangastaði félagsins, þ.e. þá sem lengst þarf að sækja á. Enn sem komið er hefur Boeing ekki boðið upp á vélar sem leyst geta 757-vélarnar fyllilega af hólmi en framleiðslu þeirra var hætt árið 2004. Gert er ráð fyrir að Boeing muni koma með slíka vél á markað árið 2025. Heimildir ViðskiptaMoggans herma að Icelandair vinni eftir þremur sviðsmyndum sem bæði geri ráð fyrir blönduðum flota Airbus- og Boeing-véla en að einnig komi til greina að aðeins verði skipt við annan hvorn framleiðandann. Icelandair hefur átt áratugalangt samstarf við Boeing en þegar samningar um fyrrnefndar 737 MAX-vélar voru undirritaðir kom einnig til greina að ganga til samninga við Airbus.