Lauf safnar 300 milljónum í hlutafé

Íslenski hjólaframleiðandinn Lauf hefur tryggt sér rúmlega 300 milljónir króna í nýtt hlutafé, en hlutafjáraukningin er leidd af Nýsköpunarsjóði atvinnulífsins. Nýja hlutafénu er ætlað að standa undir áframhaldandi uppbyggingu félagsins í Bandaríkjunum, en þar selur félagið nú hjól í 70 verslunum.

Lauf Forks hf. var stofnað árið 2011 af þeim Benedikt Skúlasyni og Guðberg Björnssyni. Upphaflega einbeitti fyrirtækið sér að sérhönnuðum demparagöfflum sem eru mjög frábrugðnir öðrum slíkum hjóladempurum á markaðinum. Notast er við svokallaða blaðfjöðrun, en hún nýtur nú einkaleyfis á öllum helstu framleiðslu- og sölumörkuðum. Árið 2017 færði fyrirtækið sig svo yfir í eigin hjól með svokölluðu True Grit-malarhjóli. Nýlega kom svo á markað hjólið Anywhere sem einnig er malarhjól, en þó meira alhliða en True Grit. Býr hjólið yfir nýrri gerð stýris sem gefur létta fjöðrun.

Frétt af mbl.is

Hafa selt yfir 500 hjól á fyrsta árinu

Frétt af mbl.is

Hefja framleiðslu á íslenskum hjólum

Í tilkynningu er haft eftir Huld Magnúsdóttur, framkvæmdastjóra Nýsköpunarsjóðs atvinnulífsins, að sjóðurinn hafi trú á að Lauf muni áfram vaxa. „Reiðhjól þeirra seljast vel út um allan heim og þá sérstaklega í Bandaríkjunum. Starfsemi Lauf Forks er dæmi um vel heppnaða nýsköpun og með auknu hlutafé fær félagið tækifæri til að sækja fram á nýjum mörkuðum.“

Frétt af mbl.is

Íslenskur gaffall um allan heim

Erla Skúladóttir, stjórnarformaður Lauf Forks, segir skynsamlegt að horfa vestur um haf í markaðssókn. „Reiðhjól Lauf Forks hafa fengið góðar viðtökur í Bandaríkjunum og því ákjósanlegt að leggja áherslu á frekar vöxt þar að sinni. Markaðurinn vestanhafs er risavaxinn og malarhjólreiðar njóta þar sívaxandi vinsælda á kostnað hefðbundinna götuhjólreiða. Þróunin á Evrópumarkaði er skemmra á veg komin en félagið vinnur að samstarfssamningi við öflugan dreifingaraðila um markaðssetningu og sölu reiðhjólanna þar á næstu misserum.“

• Blogga um frétt