Vilja selja og leigja þúsundir sporthýsa

Mink Campers ehf., framleiðandi Mink-sporthýsisins, sem ætlað er til ferðalaga úti í náttúrunni, frumsýnir í Smáralind á morgun aðra kynslóð sporthýsisins, sem nú hefur verið endurhannað með fjöldaframleiðslu í flatpakkningum og hagkvæmni í huga.

Forsvarsmenn Mink Campers, þeir Kolbeinn Björnsson og Ólafur Gunnar Sverrisson, segja í samtali við ViðskiptaMoggann að stefnt sé að því að innan fimm ára muni þeir selja um 2-3 þúsund hjólhýsi á ári, og vera þar að auki með um 2-300 útleigustöðvar fyrir sporthýsin vítt og breitt um Evrópu og Bandaríkin.

„Við byrjum að bjóða leiguþjónustuna nú á þessu ári í skosku hálöndunum, rúmensku hálöndunum, í Norður-Noregi og í Hamborg í Þýskalandi.“