Bankastjóri Arion banka lætur af störfum

Höskuldur H. Ólafsson, bankastjóri Arion banka, hefur sagt starfi sínu lausu. Stjórn bankans og Höskuldur hafa komist að samkomulagi um að hann sinni starfi bankastjóra fram til næstu mánaðamóta.

Þetta kemur fram í tilkynningu frá Arion banka.

Hagnaður bankans á síðasta ári nam tæp­um 7,8 millj­örðum króna, sem er nærri því helm­ingi minni hagnaður en á síðasta ári, þegar hagnaður­inn var 14,4 millj­arðar króna. Á sama tíma hefur arðsemi bankans dregist saman, úr 6,6% í 3,7% milli ára. 

Frétt af mbl.is

Hagnaður Arion banka dróst saman

„Nú eru um níu ár síðan ég kom til starfa hjá bankanum. Óhætt er að segja að verkefnin hafi verið fjölbreytt á þessum árum,“ er haft eftir Höskuldi í tilkynningunni. Hann segir að framtíðarsýn bankans sé skýr og að hann sé í forystu þegar komi að þróun fjármálaþjónustu.

Sviptivindar í flugrekstri hafa einnig haft áhrif á afkomu bankans, en Ari­on banki færði niður tæp­lega þrjá millj­arða króna í ábyrgðum og lán­veit­ing­um vegna gjaldþrots flug­fé­lags­ins Pri­mera Air, sem var í viðskipt­um hjá bank­an­um. Óljóst er hversu háa fjármuni bankinn mun þurfa að afskrifa vegna falls WOW air. 

Frétt af mbl.is

Arion tapaði 3 milljörðum á Primera

Af­koma Ari­on banka á þriðja árs­fjórðungi árs­ins 2017 var nei­kvæð um 100 millj­ón­ir króna sam­an­borið við 7,5 millj­arða króna hagnað á sama tíma­bili 2017. Það skýrist af niður­færsl­um á lán­um, kröf­um og öðrum eign­um sem tengj­ast United Silicon og nema alls 3,7 millj­örðum króna á fjórðungn­um og 4,8 millj­örðum á fyrstu níu mánuðum árs­ins.

Frétt af mbl.is

Neikvæð áhrif vegna United Silicon

„Bankinn er fjárhagslega sterkur með traustan grunnrekstur og vel í stakk búinn fyrir það sem framtíðin ber í skauti sér. Ég tel þetta vera rétta tímann til að fela öðrum að taka við keflinu,“ er enn fremur haft eftir Höskuldi.

Brynjólfur Bjarnason, stjórnarformaður bankans, þakkar Höskuldi fyrir starf sitt í bankanum. Stjórn bankans virði ákvörðun hans um að nú sé góður tímapunktur til að láta af störfum.

• Blogga um frétt